Kansela woshikandjohoololo shaEpembe Matheus Nanghama okwa hokolola ta ti onghalo youpangelona moshikandjohoololo shaye oi li eshongo linene, olo unene tali hepeke ovakainhu ve li momateelelo.
Nanghama okwa ti ngeenge oomeme tava fetwa ohaku dengelwa opolifi opo i yambidide nosheendifo shayo, nokutwala omukainhu koshipangelo. Ta ti oupangelo ove li kokule navali eendjila odi na efululu.
Kansela okwa ti ovakainhu ohava ende oshinano 25km tava i komafulo koupangelo omanga vamwe ohava ende 30km.
Nanghama okwa ti moshikandjohoololo shaye omu na ashike oupangelo vatatu ashike pokati kavo ope na oinano ile.
Okwa yelifa ta ti unene tuu ovakwashiwana hava longifa okapangelo Omuhongo ovo unene tava mono oixuna eshi okapangelo ke li unene kokule, ko ohaka kala keyadi ovakwashiwana ve uya okukonga omayakulo opauhaku.
Pefimbo Kundana a talela po oshikandjohoololo Epembe kansela okwa hokolola ta ti oshikandjohoololo shaye osho shimwe sha taalela omashongo mahapu eshi mu na ovakwashiwana tava mono oixuna.
Kansela okwa ti moshikandjohoololo shaye omu na omaupyakadi a yooloka ngaashi eendjila dii, eefikola inadi wana, omhumbwe yomeva eshi natango mu na ovakwashiwana hava nu omeva alula.
“Oshikandjohoololo Epembe osho shimwe shihe na ovanhu vehe li meengudu domhilameno eshi ovakwashiwana hava hoolola nelitulemo ongudu tai pangele ashike konima ngeenge ongudu tai pangele oya findana omahoololo ihai uya okutala nghee ovakwashiwana tava mono oixuna mEpembe,” Nanghama ta ti.
Onghee okwa ti efimbo keshe kombelewa oku na ovakwashiwana tava nyenyeta kombinga yomayakulo mai e li moshikandjohoololo.
“Moshikandjohoololo shange kamu na sha eike nande opate yongalama. Ohatu longifa ashike eepate di na omafululu.” Kansela ta ti.
Okwa hokolola ta ti omikunda dihapu odi na omakwatafano opangodi mai eshi oshiwana hashi kala tashi ende eendjila diledile sha uka kopolifi ile kombelewa yakansela shaashi nande nashi kendabale okudenge eengodi ihadi piti eshi pehe na omakwatafano.
Kansela okwa weda po ta ti moshikandjohoololo shaPembe kamu na eepoloyeka dovanyasha eshi mu na ovanyasha tava mono oixuna koluhepo.
“Ngeenge nande omunhu okwa lika keyoka ovakwashiwana ohava kala tava longo noudjuu okulopotela opolifi ile oshipangelo shaashi kape na omakwatafano mawa okulongifa okudenga ongodi.
Silas Nepembe omupopiliko welelo loshitukulwa shaHangwena okwa lombwela Kundana ta ti ombelewa yavo oya tula moilonga eepoloyeka dihapu tadi ka longwa moshikandjohoololo shaPembe neudo.
Nepembe okwa ti omikunda di na eemboola domeva alula mEpembe otadi ka longululwa omanga omikunda dimwepo otadi ka tungilwa eemboola domeva.