Omupresidente Hage Geingob metitano okwa yandya omaumbo opashinanena e li 142 kovakalimo volukanda Twaloloka ko Walvis Bay ovo vali va pilwa eebashu odula ya djako.

Omaumbo e li 32 okwa tungwa kehangano loShack Dwellers Federation Namibia melongelokumwe nombaanga yo Standard Bank.

Omudo wa djako eebashu 153 oda lopotwa da pyapo muTwaloloka naanhu ova kala ha vadi meetenda odo kwali va pewa kepangelo.

Moshipopiwa shaye pefimbo ta yandje omaumbo kolukanda Twaloloka, Geingob okwa ti epangelo laNamibia olina oshisho noshiwana, onghee naashi osha eta opo ovakwashiwana vomu Twaloloka opo va kale va tungilwa omaumbo kepangelo konima eshi eebashu davo dali dayanaunwa po komundilo.

Geingob opopya ta ti konima eshi ovakalimo vomu Twaloloka va kanifa omaumbo avo, okwa sha kena noilyo yomutumba wopashiwana opo va kundafane
nghee ovakalimo vena eebeshu davo dapya po tava kwafelwa.

Okwa ti elalakano lokutungila ovakalimo omaumbo oku kwashipaleka kutya ovanhu ova mona eenhele domalukalwa dili pashinanena, nokulundulula onghalo yovanhu hava di komalukanda.

“Ohatu twikile nokutungila ovanhu hava di komalukanda omaumbo eli pashinanena, onghee ohandi kunghulile omalelo eedoolopa opo a kale ta yambidida oinyangadalwa ei mokukala ta yandje edu opo ovanhu va kale va pewa omaumbo,” Geingob ta ti.

Geingob okwa yandja omahekeleko kovakwapata okaana  Fillipus Mandha oko kali ka fila moshiponga shomudila polukanda opo.

Okwa indila elelo lodoolopa yaWalvis Bay opo lilukile Mandha epandaanda.

Moshipopiwa shaye kansela woshikandjohoololo shaWalvis Bay yokoushai Florian Tegako Donatus okwa ti okwa pandula epangelo nehangano lokutungila
ovanhu vena oyuyeemo ili pedu lo loShack Dwellers Federation Namibia, melongelokumwe nombaanga yoStandard
Bank eshi va yambidida ovakalimo vokolukanda Twaloloka eshi va tungilwa omaumbo eli pashinanena.

Donatus okwa kunghilila ovakalimo opo va kale vatonatela omaumbo vavo nawa nokukala veli oupafi yomindilo shaashi oda nyika oshiponga neenghono.

– fhamalwa@nepc.com.na