New Era Newspaper

New Era Epaper
Icon Collap
...
Home / Ovakwashiwana mOnesi va lulilwa kookahenge

Ovakwashiwana mOnesi va lulilwa kookahenge

2022-06-30  Festus Hamalwa

Ovakwashiwana mOnesi va lulilwa kookahenge
Top of a Page

Kansela woshikandjohoololo shaNesi Festus Simon Petrus okwa hokolola ta ti ovakalimo vomoshikandjohoololo shaye ova lulilwa keendjaba da lopotwa de liteyela momikunda davo.

Okwa ti konima yoivike ivali okwa lopototwa eendjaba nhee momikunda Akahonde, Ondjandja nOshikondailongo konima eshi da ponokela omaumbo ovakwashiwana.

Petrus okwa ti Omaandaxa oshivike eshi natango komukunda Akahonde okwa lopototwa ondjaba imwe tai li po omatanga nomanyangwa ovanhu momaumbo.

Pefimbo a ninga eenghundafana naKundana kansela okwa hokolola ta ti oshiwana inashi manguluka vali ngeenge tashi ende moixwa ile ngeenge sha nangala eshi hashi kala sha kwatwa koumbada wokuponokelwa keendjamba.

“Ovanhu vamwe ove na omaumbo avo omiti a tewa po keendjaba eshi hadi kala da hala okuya momaumbo di ka lye omatanga,” Kansela ta ti.

Petrus okwa hokolola ta ti ovakulupe navo ove na oumbada wokuponokelwa keendjaba ngeenge tava di keenhele dokukwatela opendjela.

Onghee okwa ti eshi oshi li sha nyika oshiponga ngeenge ondjaba oya hange omukulupe ta ende oye auke moixwa ile a hangika meumbo shaashi omukulupe iha dulu okufaduka po.

Okwa yelifa ta ti kapena omunhu a lopotwa a xulifa ile omonifwa oshiponga keendjamba fiyo opapa.

 

“Ovanambelewa va dja kouministeli womidingonoko nomatalelepo ove lihanena moshikandjohoololo shetu tava konakona eendjaba noshoyo okukula ve di shingila kokule,” Petrus ta ti.

Okwa kunghilila oshiwana opo shi kale alushe tashi lopotele ombelewa yaye diva ngeenge sha mona eendjaba opo a shiive okukala a lopotela ovanambelewa ha longo noifitukuti.

Pefimbo a ninga eenghundafana naKundana omupopiliko mouministeli womidingonoko Romeo Muyunda, okwa ti eli olo efimbo leendjaba di hole okuendaenda eshi hadi kale tadi kongo omeva noikulya.

Muyunda okwa ti oshiwana nashi xulife po okutula omatanga, omanuwa nomanyangwa poluhaela shaashi eshi otashi nane eendjamba di kale da ponokela omaumbo avo.

“Ovanambelewa vetu ove li longekida efimbo keshe onghee osha fimana opo oshiwana shi kale tashi lopotele opolifi, ookansela,” Muyunda ta ti.

Okwa kunghilila oshiwana opo shiha tataye eendjamba ile oku di denga shaashi ondjaba otai dulu okutanauka ndele tai va ponokele.

Okwa weda po ta ti ovanhu nava xulife po okukala tava ende oufiku ngeenge tava di keendingosho shaashi ngeenge kwa laula omunhu ita dulu oku monena po ondjamba diva. fhmalwa@nepc.com.na


2022-06-30  Festus Hamalwa

Share on social media
Bottom of a page