WALVIS BAY - Opolifi yaNamibia oya kwatulula omunadolongo umwe womovanadolongo vane ovo ve livaka modolongo koHenties naumwe oo a li a faduka po okudja komangulilo yaMangestalata moKaribib muMaalitsa neudo.  

Pefimbo a li ta yandje ouyelele koikundaneki mOmaandaxa, omukwatakanifi koshikondo shokukonaakona oimbuluma mErongo Omupedukomufala Erastus Iikuyu okwa ti Johannes Nuseb (19), okwa li a kwatululwa lwopotundi 22h23 mOmaandaxa koSwakopmund. 

Ta weda po vali ta ti omulivaki modolongo omutivali oye Ricky Goagoseb (32) oo a xutuka momake opolifi omanga a li ta di momhangulilo koKaribib muMaalitsa. Ye okwa li a kwatululwa a hangwa koWindhoek mOmaandaxa.

Nauseb navakwao ova li va faduka po okudilila mondjedililo yopolifi koHenties Bay komatango Olomakaya.  Ovafadukipo pamwe naye, natango ove liwe mokashoko kopolifi. Ovo inava monika natango ovo nanee Josef Ganaseb (24) naMarkus Tauxab (25), ovo aveshe ve na oibofa yekwatonghonga. Omufekelwa omutitatu, Andreas David (21), ye okwa li e na oshibofa shomunyeka kwa homatiwa, e u ningila mo Swakopmund.

Ouyelele wa yandjwa kopolifi, otau ti eenghwatwe nhee oda longifa oilongifo ihe shivike okuteta omuvelo woshitenda wokanduda kodolongo, noitenda imwe meembuli omo va pitila nokufaduka po. 

Opolifi otai pula ou e na ouyelele shi na sha novalumenhu ovo vatatu opo a kwatafane naCommissioner Erastus Iikuyu kongodi yonomola 0812464757 ile Detective Warrant Officer, Sakaria Shikalepo ko0812735662 ile u lopote poshitaasi shopolifi i li popepi.