New Era Newspaper

New Era Epaper
Icon Collap
...
Home / Ovanadolongo komavyulonghalo moWindhoek va hangwa neengodi

Ovanadolongo komavyulonghalo moWindhoek va hangwa neengodi

2022-01-26  Festus Hamalwa

Ovanadolongo komavyulonghalo moWindhoek va hangwa neengodi
Top of a Page

Festus Hamalwa

Omupopiliko koshikondo shomavyulonghalo Commissioner Sam Shaalulange okwa ti ovanadolongo vahapu ve li komavyulonghalo moWindhoek ohava kwatwa ve na eengodi dopeka eshi hava kala tava longifa eengodi.

Okwa ti oWindhoek oyo imwe yadidilikwa i na omwaalu muhapu wovanadolongo  hava hangika ve na eengodi dopeke.

Shaalulange okwa ti unene tuu ngeenge ovanadolongo tava i  kondje yevyulonghalo ngaashi okuya komangu ile koshipangelo vahapu ohava kwatwa neengodi dopeke konima ngeenge va lukile modolongo.

Edi Shaalulange okwe di popya Etivali eshi a ninga eenghundafana naKundana ta ti onghalo yovanadolongo momavyulonghalo aaWindhoek tava kwatwa neengodi otai dana onghandangala  ya kula  shaashi keshe moshivike momavyulonghalo oha mu lopotwa omunadolongo a kwatwa nongodi.

Okwa ti omavyulonghalo akwao omoshilongo iha kulopotwa ovanadolongo tava kwatwa neengodi shaashi ovadolongo ohave liufa keemhango edi da tulwa po.

“Ovanadolongo vamwe ohava kwatwa yoo vali noingangamwifi have i pewa kovanhu tava di kondje ngeenge veu ya okutalela po ovakwapata vavo ve li modolongo,” Shaalulange ta ti.

Onghee okwa kunghulila oshiwana sho kondje opo shixulife po onghalo yokuyandje eengodi kovanadolongo oshoyoo oinima ya nyika oshiponga ngaashi oingangamwifi.

Okwa ti ku keshe ou ta ka monika ta yandje ongodi komunadolongo ile oinima ina i pitikwa okukala modolongo ota pewa ehandukilo lopaveta.

“Ngeenge ovanadolongo tava longifa eengodi eshi veli modolongo otwa didilika vahapu hava kala tava tula ovanhu mokatoo  eshi hava kala tava tula oinima komalungula kutya otave i landifa po omanga vamwe ohava kala tava kundafana oinima youlingilingi novakwapata vavo,” Shaalulange ta ti.

Okwa weda po ta ti ovanambelewa vokomavyulonghalo ove li longekida okukala va tula po elandulafano komavyulonghalo nokukala yoo vali tava yakula ovanadolongo pa mukalo muwa.

fhamalwa@nepc.com.na


2022-01-26  Festus Hamalwa

Share on social media
Bottom of a page