Komufala woshikondo shomavyulonghalo Raphael Hamunyela ota ti oshikondo shomavyulonghalo moshilongo osha tokola opo ovanadolongo vape va kale tave li kalekelwa tete omanga in ava ya mumwe navakwao.
Hamunyela okwa hokolola ta ti ovanadolongo ngeenge tava i kodolongo loshikando shotete otava kala veli kalekelwa tete. Onghee okwa hokolola ta ti eshi otashi osha tulwa po onga onghendabala oku kondeka etandavelo lombuto yoCovid-19.
Hamunyela okwa ti osha nyika oshiponga okutula omunadolongo ta di kondje mokati ka vakwao shaashi ngeenge omunadolongo oo mupe okuna oCovid-19, ope na omito yokukala apa vakwao a va ta hange meni lodolongo.
“Onghee hano keshe omunadolongo teya lotete kevyulonghalo okuna okukala eli ka lekelwa oule womafiku eli ayeyali opo kukwashipalekwe kutya kenasha oCovid-19. Otuna elalakano opo tu xulife po etandavelo lombuto komavyulonghalo moshilongo ashishe, nokukwashipaleka kutya ovanadolongo navo ova amenwa kombuto ei,” Hamunyela ta ti.
Komufala okwa ti mopaife ngaha eedolongo odihadi neenghono, keshe efiku modolongo ota muya ovanhu vape, onghee naasho oshe va pa opo va tule po omilandu dipe koshikondo shomavyulonghalo.
Hamunyela okwa weda po vali ta ti ngeenge omunadolongo okwa li aya komangu efiku olo, nena hano eshi taa lukile kevyulonghalo okwa pumbwa okukala akonakonwa ombuto shaashi okwali eli mokati kovanhu komangu.
“Otwa longekida eenduda da wana komavyulonghalo moshilongo ashishe odo tadi kala tadi longifwa oku tula ovanadolongo vape opo veli ka lele manga tava ningilwa omakonakono oCovid-19,” Hamunyela ta ti.
Hamunyela okwa ti omandiki ouhaku okuli taa longo nelitulamo efimbo keshe komavyulonghalo, onghee ovanadolongo ove li mefiloshisho la wana ngeenge tashi ya pauhaku.
“Ina kupitikwa omatalelepo pefimbo eli loCovid-19 tai dana onghandangala moshilogo tuu nande. Oshiwana ina shi pitikwa opo shi etele ovanadolongo oikulya ile omiti komavyulonghalo, onghee ngeenge omukwapata okuna eshi ahala oku pa omunadolongo okwa teelelwa opo ashike akele atuma oshimaliwa ile teshi pe ovanambelewa a longele mevyulonghalo,” Hamunyela ta ti.
Okwa ti oCovid-19 omukifi wa nyika oshiponga, onghee oshiwana osha pumbwa shili ufe komilandu da tulwa po.