Aus – Ovanafaalama moAus otava lili kenota loimuna, otava tumbula kutya omeva oo hava pombo okudja momboola oyo i li mofaalama omanini, itaa wanene okuxwiilila oimuna oyo i li mofaalama, ngaashi unene tuu oimuna oyo i li mofaalama yepangelo Kanus, momukunda oAus, moshitopolwa sha //Kharas.
Omunafaalama moAus Petrus Shiimbashike okwa hokololela Kundana kuyele oshivike eshi kutya konyala oule weedula da konda puhamano paife inava mona nande odula ya wana. Odula yoneudo ova mona ashike omata manini neenghono.
Shiimbashike ota hokolola kutya, voo ove li ovanafaalama, ve li mofaalama yepangelo ashike okuhovela muDesemba 2018, ovanageshefa ovo ve li meefaalama dopaumwene otava ende tava tauka ko keefalalama davo dopaumwene, tava eta oimuna yavo mofaalama yepangelo, osho Shiimbashike a tumbula kutya osha weda ko vali komukundu oo va panga nao eedula adishe odo noshikukuta, shoo osho vali sha eta omukundu womeva, a kale itaa wanene oimuna aishe oyo i li mofaalama .
Ota tumbula, ta ti omboola oyo i li mofaalama oishona oo nomeva medu kae li mo ahenhena.
“Omunhu oto dulu okumeneka ongula to pombo omeva u nwefe oimuna ndele oto papala ashike eshi etango la ningina, wanhwefa ashike oimuna ishona inai fika nokuli nometata loimuna oyo i li mofaalama.
Oimuna paife mofaalama oi li mo ya hapupala unene, nokamwiidi oko ka li mo paife oka kunyunwa mo koimuna, oyo yadja keefaalama do paumwene, paife oimuna yetu otai li ashike edu.
Otwa ninga ngaa eenghendabala noumunisteli womadu, opo uye mo moshinima eshi shovanafaalama ovo va kufa oimuna yavo meefaalama dopaumwene noku eta oimuna yavo mofaalama omu tu li yepangelo fyee out li mo nale noimuna yetu ya yeleka ounene wofaalama.” Shiimbashike osho a yelifa.
Okwa tumbula kutya ottava kala omutumba nomukalalelipo wouministeli womadu, oshivike eshi, va tale ngee tava mono ekwafelo, momukundu oo ve na. Mofaalama omu na oikombo, eedi, neengobe.
Aus oi li moshikandjohoololwa sha!Nami#nus , oule weekilometa di li 123 okuya modoolopa yokomukunhulofuta yaLüderitz moshitopolwa sha //Kharas.