New Era Newspaper

New Era Epaper
Icon Collap
...
Home / Ovanafikola 23 koGabriel Taapopi va monika oCovid-19

Ovanafikola 23 koGabriel Taapopi va monika oCovid-19

2021-02-16  Staff Reporter

Ovanafikola 23 koGabriel Taapopi va monika oCovid-19

Festus Hamalwa

Okwa didilikwa ovanafikola ve li 23 nomulongifikola umwe mosekundofikola yaGabriel Taapopi moshitukulwa shaShana va kwatwa kombuto yoCovid-19 mexuliloshivike. Omukulunhufikola Sakaria Eelu okwa koleka onghundana ei.

Eeulu okwa ti ounona va kwatwa, oukadona ove li 13, oumati ove li 10 nomulongifikola omukainhu umwe.
Okwa yelifa kutya ounona ava ove li kalekelwa paife momuhandjo wofikola opo vaha ye mekwatafano navakwao nokukeelela etandavelo lombuto, omanga omulongifikola oku li keumbo laye e likalekelwa.

Omukulunhufikola ota ti ovanafikola ava inava pitikwa okuya keetundi ile okuya kekulo vaka lye. Onghee ohava twaalelwa oikulya komuhandjo wavo i li moubaki hava ekelwashi ngeenge va mane okulya.

Okwa hokolola kutya ounona ove li monghalo iwa nonande pe na ngoo vamwe vashona ovo ve li ve na omukolo neshikisha.
“Oministeli wouhaku owa tuma omiti opo ounona ava va kwatwa va pewa omiti edi opo di shiive okukwafela ovakwaita volutu lavo,” Eelu ta ti.
Ota ti ovanafikola ava okwa li va ningilwa omakonaakono ombuto ei Etine loshivike sha dja ko noidjemo yavo oye ya mOshoondaxa shomafiku 14 Febuluali 2021 tai ulike kutya ova kwatwa.

Okwa twa ovanafikola omukumo opo va kale ve li melimweneno vaha kwatwe nande komadilaadilo mai. Kovadali okwa ti nava ngungumane ashike ofikola pamwe nouministili yuukolele otava ka fiila ounona oshisho sha wana nokukwashipaleka kutya ove li meyameno.


2021-02-16  Staff Reporter

Share on social media