Festus Hamalwa
Omukulunhuwiliki wehongo moshitukulwa shaMusati Benny Eiseb okwa hokolola ta ti ovanafikola ve li meendodo dopedu ohava faula okuya keetundi ngeenge oufila wetete wa pwa po.
Okwa ti ombelewa yaye oya kala nokumona eelopota tadi di keefikola kombinga younona tava faula ngeenge pehe na sha oufila wokutelekela ounona okatete.
Edi Eiseb okwe di popya Etivali eshi a ninga eenghundafana naKundana eshi hokolola nghee etete la fimana kovanafikola ve li meendodo dopetameko. Eiseb okwa ti etete ola fimana shaashi ohali tu ovanafikola omukumo opo va kale tava i keetundi efimbo keshe.
“Osha fimana opo opolongalama yokutelela ovanafikola etete i kale tai twikile meefikola unene edi dili komikunda,” Eiseb ta ti. Efikola 248 domoshitukulwa shaMusati ondili hadi mono ouwa mokupitila mopolongalama ei yokutelekela ovanafikola okatete.
Ovanafikola mOmusati 76393 ohava telekelwa okatete keefikola davo omanga ovanafikola vamwe ohava ka lya okatete keefikola dimwe edi da shaama neefikola davo.
Omukulunhuwiliki wouministeli wehongo lopetako Sanet Steenkamp okwa lombwela Kundana ta ti ouministeli wehongo otau kwashipaleke kutya keefikola a dishe oku na eepolongalama dokutelekela ovanafikola okatete.
Steenkamp naye okwa hokolola ta ti opolongalama yetete oya fimana kovanafikola shaashi oha i kwafele ovanafikola opo va kela ve li tula mo ngeenge ve li meetundi tava longwa.
“Okaana ngeenge ka lya etete iha kala ta ka kofa meetundi onghee eshi oha shi yandje omukumo kovanafikola va kale ve na ohokwe yokulonga oinyangadalwa yavo nondjungu noshoyo oku shi endi fa nawa moinyadalwa yavo,” Steenkamp ta ti.
Okwa ti ovanafikola 461839 ve li meendodo dopetameko ove li hava mono ouwa mokupitila mopolongalama yetete keefikola davo.
Omudo wa dja ko ovanafikola 451 000 ve li meendodo dopedu navo ova mona ouwa okupitila mongalama yokatete. Onghee okwa ti ounimisteli ou na oshinakuwanifa opo u kale wa kwashipaleka kutya eefikola edi di na eendodo dopetameko oku na opolongalama yokutelekela ovanafikola oketete.
“Ouministeli wetu owe li pyakidila nokukala wa eta po omaumbo 29 moitukulwa iheyali oo ta kala hamu di ovanafikola opo va dule okukala tava telekelwa oikulya,” Steenkamp ta ti.
Okwa weda po ta ti eefikola na di twikile okukala ta di ningi oikunino opo ovanafikola va dule okukala tava longo oikulya yavo vene. - fhmalwa@nepc.com.na