Ominista yehongo Anna Nghipondoka okwa ti ovanafikola ve na omadidiliko oCovid-19 nava lopotwe diva opo va twalwe koipangelo.
Nghipondoka okwa kunghulila ovadali opo va kale ve na oshinakuwanifa shokushivifila ovahongifikola kombinga younona vavo ngeenge tava ulike omadidiliko ombuto yoCovid-19 opo va kale va ningilwa omakonakono diva.
Okwa ti eshi otashi kwafele okushunifwa pedu etandavelo lombuto meefikola unene tuu pefimbo eli oshilongo shataalela ekufikufi etine.
Nghipondoka edi okwe di popya onghela eshi a ninga eenghundafana naKundana eshi a hokolola ta ti ovadali nava longele kumwe neefikola mokukondjifa ombuto yoCovid-19.
Okwa ti okaana ngeenge okena omadidiliko oCovid-19 ina ka pumbwa okuya kofikola kaka kale keli mekwatafano navakwao shaashi eshi otashi eta ombuto i kale ya kwata ovanafikola vahapu.
“Oministeli yehongo oyeli longekida okukwashipaleka kutya ovanafikola novahongikola oveli meameno lawana loCovid-19. Otuna oikwafifo yoCovid-19 ngaashi eefewa nosho tuu ikwao keefikola adishe,” Nghipondoka ta ti.
Okwa ti oshiwana nashi xulife po okutandaveleka ouyelele woipupulu kutya eefikola dimwe kadi na sha oikwafifo yokukelela ombuto yoCovid-19.
Okwa kunghulila ovahongifikola opo va kale vena oshinakuwanifa kutya okaana keshe oka djala okalapi kokomulungu ngeeenge keli mokati ka vakwao nokukwashipaleka kutya milandu doCovid-19 ota di wanifa po efimbo keshe keefikola.
Nghipondoka okwa ti ombelewa yaye otai twikile nokulongela kumwe nouministeli wouhaku nonghalo nawa mokukondjifa ombuto koshikondo shehongo.
“Ovahongifikola nava yandje oshiholelwa shiwa kovanafikola shokukala tave liufa komilandu doCovid-19,” Nghipondoka ta ti.
Okwa ti oshikondo shehongo otashi twikile nokutula po omilandu keefikola edi dina ovanafikola va kwatwa kombuto opo va kale veli kalekelwa nokukala veli mefiloshisho la wana.
“Ovakulunhuwiliki wehongo koitukulwa ya yooloka nava kwashipaleke kutya eefikola odina oikwafifo yoCovid-19 ya wana okulongifwa,” Nghipondoka ta
ti.
Okwa ti okwa pandula eefikola eshi da kala nokulonga noudinini mokutula po omilandu doCovid-19 omudo wa djako.
Okwa weda po ta ti ovahongifikola nava longe nondjungu moilonga yavo.