New Era Newspaper

New Era Epaper
Icon Collap
...
Home / Ovanhu 18 momukunda umwe ve limangeleka 

Ovanhu 18 momukunda umwe ve limangeleka 

2022-01-25  Festus Hamalwa

Ovanhu 18 momukunda umwe ve limangeleka 
Top of a Page

Festus Hamalwa

Omupopiliko wopolifi moshitukulwa shaHangwena Inspector Kaume Itumba okwa hokolola ta ti omudo wa dja ko ovanhu 18 ova fya eshi ve li kufa eemwenyo momukunda Enyana moshikandjohoololo shaKongo, moshitukukulwa shaHangwena.

Itumba okwa ti omukunda Enyana owa didlikwa u na ovanyasha vahapu hava kwatwa komadilaadilo oku li mangeleka omanga ovakulupe ova shona va lopotwa ve li mangeleka.

Okwa ti eshi oshili sha limbilika oshiwana shonghalo yovanhu  vahapu veli mangeleka momukunda umwe ashike kapena nande omunhu a fiya po omukanda tau yandje ouyelele kombinga yefyo laye.

Itumba okwa ti Enyana olo limwe lina omwaalu muhapu wovanhu ve li mangeleka moshitukulwa shaHangwena.

Okwa kunghulila oshiwana unene tuu ovanyasha opo va kale tava ka konga omakwafo kovafitaongalo, ovaxungimwenyo,  kovapolifi nokovakwapata vavo ngeenge ve li hange tava hepekwa koupyakadi wopamadilaadilo shaashi okuli kufa omwenyo kashishi etokolo lomondjila.

Itumba okwa kunghulila oshiwana opo shi kale tashi yambidida ovanhu ngeenge tava hepekwa komadilaadilo shaashi eshi otashi kelele omunhu a kufe omatokolo maii ngaashi oku li mangeleka.

Okwa tweda po ta ti opolifi moshitukulwa shaHangwena ohai ningi oikonga momikunda da yooloka tai yandje ehongo moshiwana kombinga yoinima ya nyika oshiponga ngaashi oingangamwifi, okulongifa omaludu sha pitila, omahepeko oukashike kookanhu oshoyo oupyakadi wopamadilaadilo opo oshiwana shi ha ninge oihakanwa yoinima maii.

fhamalwa@nepc.com.na


2022-01-25  Festus Hamalwa

Share on social media
Bottom of a page