New Era Newspaper

New Era Epaper
Icon Collap
...
Home / Ovanhu 29 ve limangeleka moKhomas

Ovanhu 29 ve limangeleka moKhomas

2022-07-08  Festus Hamalwa

Ovanhu 29 ve limangeleka moKhomas

Festus Hamalwa

Omupopiliko wopolifi moshitukulwa shaKhomas Warrant Silas Shipandeni okwa ti neudo moKhomas omwa lopotwa omwaalu muhapu wovanhu ve likufa eemwenyo, ve li 29.

Okwa ti ovalumenhu ovo unene va ninga oihakanwa yokulimangeleka eshi ve li pombada nomwaalu 18 omanga ovakainhu ove li 11.

Okwa yelifa ta ti unene tuu ovanyasha ovo vamwe va ninga oihakanwa yokulikufa eemwenyo eshi hava kala tava hepekwa koupyakadi wopamadilaadilo.

Shipandeni okwa lombwela Kundana ta ti opolifi oya didilika eelopota dihapu dovanhu va fya eshi ve limangelekela momiti omanga vamwe ohave limangelekela meebashu davo dokunangala.

Okwa ti ovanhu aveshe ve likufa eemwenyo kape na ou a fiya po omikanda tadi yandje ouyelele kombinga yomafyo avo.

Shipandeni okwa kunghilila oshiwana opo shi kale tashi ka konga omakwafo kovaxungimwenyo, keengeleka noshoyo va popye novakwapata vavo ngeenge ve na omaudjuu shaashi okulikufa omwenyo kaku shi ekandulepo lomukundu.

Eshi a ninga eenghundafana naKundana, omuxungimwenyo mouministeli wouhaku Tuwilika Kalunduka, okwa kunghilila oshiwana  opo shi kale tashi kongo omakwafo ngeenge sha kwatwa komhepo yokulikufa omwenyo.

Okwa hokolola ta ti ovanhu vamwe ohava kwatwa komhepo yokulikufa omwenyo ngeenge tava hepekwa koupyakadi wopamadilaadilo omanga vamwe ohava kala ve na omaupyakadi momakwatafano opaihole novaholike vavo ile tava hepekwa konghalo yoluhepo.

“Ovanhu tava hepekwa koupyakadi wopamadilaadilo, ovanhu ve na omakwatafano opaihole taa shongola ile onghalo yoluhepo nava kale tava kwatafana neembelewa detu  opo va dule okukala  va mona omakwafo  diva,” Kalunduka ta ti.

Okwa weda po ta ti unene tuu ovanhu hava etekele okulikufa omwenyo ngaashi okutetwa meemhango inava pumbwa okukala ve likalela. 

fhamalwa@nepc.com.na 


2022-07-08  Festus Hamalwa

Share on social media