Omupopiliko woNational Road Safety Council Ambrosius Tierspoor okwa ti neudo okudja momwedi Januali fiyo 14 Desemba, ovanhu 492 ova fila moshiponga sheetuwa amanga ovanhu 4921 ovalemanena moshiponga sheetuwa.
Okwa ti neudo ombelewa oya lopotelwa omwaalu wovanhu vahapu vakanifila eemwenyo davo moiponga yeetuwa okufafanifa nomido mbali da pita.
Tierspoor okwa ti neudo moNamibia omwa lopotwa omwaalu 2883 woiponga yeetuwa eshi da mona oiponga meepate.
Meenghundanafana a ninga naKundana Etine Tierspoor okwa kunghulila ovashingi veetuwa ta ti nava kale tava shingi noukeka, vo tave liufa komadidiliko omeendjila opo kukelelwe oiponga pefimbo eli lomatango
manene. Okwa ti oNational Road Safety Council pamwe nopolifi otava kwashipaleka kutya oshiwana osha pewa ouyelele uli kombinga nghee shina okulongifa eepata pefimbo eli.
“Otwa tameka nale okuninga omainda meepate opo tu kale a tukonakona ovashingi ava i tave liufa komilandu edi da tulwa po meendjila shaashi otwa didilika ovashingi vamwe ihava ve liufa kolamindu,” Tierspoor ta ti.
Okwa ti efimbo eli lomwedi Desemba olo limwe la didilikwa ovanhu hava kanifile mo eemwenyo davo moiponga yomeendjila eshi ovanhu hava kala tava shingi eendjiladiledile vau ka keenhele da yooloka, onghee okwa kunghulila oshiwana opo shi kwashipaleke kutya otashi shingi noukeka efimbo keshe.
“Ovanhu nava kale tava longekida omalweendo avo pefimbo opo kukelelwe ovanhu tava shingi tava e ndelele kominute daxuninwa shaashi osha nyika oshiponga ngeenge omunhu ta shingi a ndelela,” Tierspoor ta ti.
Okwa kunghulila ovashingi opo va kale tava konakona tete eetuwa davo va tale ngeenge odili tuu monghalo tai dulu okushangwa oshinano shile.
“Ovanhu aveshe veli motuwa nava kale veli momapaya, ovanhu ina va pitikwa okushanga va nwa omalodu, omunhu ehe na omukanda ina pitikwa okushinga kopate,” Tierspoor ta ti.
Okwa ti ovanhu nava ninge etokolo lomondjila lokukala tava longele kumwe, nokulifa komilandu efimbo keshe opo ku xupifwe eemwenyo.