Kansela woshikandjohoololo shaKatana Edmund Iishuwa okwa ti moshikandjohoololo shaye omuna eepoloyeka dovanyasha dihapu da yooloka.
Iishuwa ta ti ovanyasha vomoshikandjohoololo shaye otava longo noudinini okukondjifa ondjala noluhepo tashi pitile moinyangadalw ya yooloka.
Ovanyasha ove na eepoloyeka ngaashi oikunino mwa kunwa omaludi oimeno a yooloka, opoloyeka yeexuxwa, opoloyeka yokutekula oingulu, nopoloyeka nokutekula eeshi. lishuwa ta ti ombelewa yaye oya pandula unene ovanyasha eshi tava longo noinyangadalwa opo va dule oku shakeneka epangelo ondjilakati tashi pitile mokweta po oilonga yavo vene.
Okwa ti ovanyasha vahapu ova pewa omakwafo opashimaliwa noikwafifo yokulongifa moikunino yavo okudilila mombelewa yaye omanga vamwe ova konga omakwafo avo vene.
“Ombelewa yange oya kala nokuyandja omadeulo kovanyasha kombinga nghee vena okulonga nomaludi oimeno onghee onda ninga onghendambala opo ndi konge ovanhu vena ounongo mounamapya opo ve u ye okutopolafana ounongo wavo novanyasha,” lishuwa ta ti. Okwa popya ta ti paife ovanyasha ohava longo oshimaliwa shavo vene konima ngeenge va landifa oikunomwa yavo.
“Ovanyasha vamwe ova yandja oilonga kuvakwao paife ngaashi ngeenge owa i koikunino ihapu yomoshitukulwa shaKatana oto hange ovanyasha tava longo moikunino ya vakwao eshi va pewa oilonga omanga vamwe ohava longo meepoloyeka deexuxwa neeshi da vakwao,” Iishuwa.
Okwa yelifa ta ti oshikandjohoololo shaye osho shimwe shina ovanyasha vahapu vena eepoloyeka tadi shi edi fa nawa mokulonga oshimaliwa.
“Ku keshe omunyasha e na ehalo lokutameka nopoloyeka yaye younamapya ile yokutekula eexuxwa nosho tuu epoloyeka dikwao na kale a kwatafana nombelewa yange, fye tu kale twa ninga omalongekido nghee e na okukala a yambidindwa,” Iishuwa ta ti.
Okwa denga omufindo ta ti ounamapya owa fimana shaashi ovanyasha ohava dulu okulonga oikulya yavo vene, wo vali ohau dulu okuhambula po eliko loshilongo.
Okwa twa onvayasha vovakainhu opo va kale tava longifa ounongo wavo okukala tava longo oilonga younghulungu ngaashi otunga oimbale nokuhonga omatiti.
“Ovanyasha na va kale tava longele kumwe mokuyambididafana moinyangadalwa yavo nokukala tava topolafana omayelele nghee vena okutula eepoloyeka davo pamufika wopombada,” Iishuwa ta ti.