Ominista yomaudano, ovanyasha nomayakulo opashiwana Agnes Tjongarero okwa kumaida ovanyasha opo va ye komandiki okudeula ovanyasha momaifano a yooloka.

Okwa yelifa ta ti ouministeli waye ou na omandiki a yooloka a nuninwa okuyandja omadeulo kovanyasha opo va mone ounongo momaifano oo va hala okushikula.

Onghee okwa ti komandiki avo ohaku di ovanyasha ve na ounongo molwashi ohava pewa omadeulo ongushu.

“Ovanyasha vamwe va dja komandiki etu ohava ka eta po eemhito doilonga tashi pitile mokuninga eengeshefa davo vene,” ta ti.

Okwa weda po ta ti ei omhito iwa yokukondjifa ondjala noluhepo noshoyo okuhe na oilonga movanyasha.

Edi Tjongarero okwe di popya pefimbo kwa li ta patulula omaundano pambelewa omo kwa li omahangano opapangelo a hangana nokukufa ombinga momaundano kendiki lokudeula ovanyasha loReitfontein mexuliloshivike.

Omudo keshe omahangano oo a nyama kepangalo oha shakene nelalakano loku kufa ombinga momaundano.

Momudo tau ya omaundano otaa ka kala kOshakati moshitukulwa shaShana.

Omaudano oo a li ko ongaashi etanga lokeemadi, etanga lomonete, lomokambaba, okulotoka nosho tuu.

Tjongarero okwa kumaida omahangano a nyama kepangelo opo a kale e na oukumwe nelongelo kumwe mokuyambidida ovanyasha.

“Ohandi indile omahangano opo a kale taa yambidida omandiki okudeula ovanyasha noikwafifo molwashi otuna omandiki mahapu a pumbwa oikwafifo,” ta ti. 

fhamalwa@nepc.com.na