Aletta Shikololo

WINDHOEK- Waa kambadhala ku sindi tuu shili, osho omukulu gwonale a ti ngaaka. Sho omithigululwakalo moNamibia tadhi ende tadhi shongola, mwa kwatelwa naadhoka dhOshiwambo, ope na oonkambadhala ngashiingeyi dhokuyumudha, okuyambula po nokukwatela po omithigululwakalo, mOlyomakaya, Oxungi ndjoka ya li ko moshilandopangelo oya li ya hili aantu oyendji.

Oshiindingili shika osha li sha totwa po kuyele nuumvo komunamimvo 22 Helena Amweenye, ngoka e li wo omulongwa moshiputudhilo shopombanda shoNamibia University of Science and Technology (NUST), Helena okwa li a nyakukwa sho a mono omwaalu gwaagundjuka ngoka gwa li gwa holoka poshiindingili shika ya zala iizalomwa yawo yOshiwambo yo taya popi omalaka gaandjawo.

Amweenye, ngoka e na ondjodhi  okukala omunangeshefa okwa li a shambulwa  koshiindingili shika sho sha li she ende nawa, ta ti onawa sho aagundjuka oyo ya holoka unene, oshoka oyo ye na oshinakugwanithwa shokuyumudha omithigululwakalo dhawo. Amweenye ta popi nkene hashi mu uvitha nayi sho aagundjuka oyendji ihaaya adha mo nawa momalaka gooyina, yo natango kombinga yomithigululwakalo ihaya tsu ya thithe, naashika osho she mu kumike e ye po nedhilaadhilo lyokugongala ngeyi opo ku kwathelwathane okutaaguluka omayinda ngoka ge li po. 

“Onde ya po nedhilaadhilo ndika opo aantu ye ye pamwe yo ya ilonge iinyangadhalwa ya yooloka yomithigululwakalo. Onda hwahwamekwa kondjala yandje mwene yuunongo moka nda hala okutseya omuthigululwakalo gwetu noku gu kaleka po. Onkene oshiindingili shika osha simana opo tu pungule shoka twa thigilwa po kookuku,” omunasikola nguka ta ilongele oAccounting ta fatulula ngaaka.

Poshiindingili opwa li wo pwa holoka omuhikingalo Ndasuunye Shikongeni, a tseyika nawa nedhina Papa Shikongeni, Omulongi gwOshiwambo koUnivesiti yaNamibia Petrus Mbenzi osho wo omushangi gwomambo Kapadhi Uiras mboka ya li ya kuthile ko aagundjuka kombinga yesimano lyomithigululwakalo nankene dhi na okukalekwa po. Kombinga yiidhano yopamuthigululwakalo ongoye ashike mwene wa li to ikondo ko, osho wo iinyangadhalwa yimwe ngaashi oongano, owela osho wo uuhokololo mboka hawu hokololwa piinyanga.

Ta popi noEntertainment Now! Papa Shikongeni okwa li a tsu aagundjuka omukumo yaa kanene meyana lyomithigululwakalo dhaakwiilongo ashike naya simaneke nokuhokwa omithigululwakalo dhawo.
“Mongashiingeyi aagundjuka oya simaneka omalaka gAaeuropa shi vulithe omalaka gawo. Oto kala ngiini wa za onta mOshiingilisa, Oshindowishi nOshimbulu ngoye nani ito vulu nokupopya etumbulo limwe alike lyOshiwambo inoo lumbakanitha mo omalaka galwe?” Oto ya adha ye li momainingitho kutya kaye shi kupopya omalaka gawo ashike ohaya si ohoni uuna yaa shi okupopya omalaka omakwiilongo.” Osho Papa Shikongeni a li a dhenge omuthindo ngaaka.

Uiras ngoka a shanga omambo ge melaka lyOshiwambo nelalakano lyokukale ka po elaka, okwa li a kuthile ko aaunganeki yOxungi egala sho ya dhana onkandangala mokukaleka omuthigululwakalo nomwenyo, ta ti okwa ilonga mo oshindji.
“Uunona wetu owundji owu li moosikola dhi na omithigululwakalo odhindji dha yooloka sho osho oyendji haya kanitha omuthigululwakalo ngaaka, onkene iiyindingili ngambika oya simana okulonga uunona wetu omidhi dhetu,” ta ti ngaka.