New Era Newspaper

New Era Epaper
Icon Collap
...
Home / Oya tindile ndje evi – Ndeitunga “Kalunga ne ya dhimine po”

Oya tindile ndje evi – Ndeitunga “Kalunga ne ya dhimine po”

2022-08-23  Victoria Kaapanda

Oya tindile ndje evi – Ndeitunga “Kalunga ne ya dhimine po”

“Ga kondjo! Omatemo ogi idhenge mumwe! Nonando ethimbo lyandje lyokuthiga po iilonga yandje lya thikana konima yomimvo 26, otandi yi ihe kandi na mpoka tandi lithile iimuna yandje.”

Ndhoka okwa li dha popiwa kukakukutu komatanga gopolisi Sebastian Haitota Ndeitunga, moonkundathana noshifokundaneki shika, sho ta nyenyeta kutya okwa tindilwa evi.

“Ondi na evi koshitopolwa shaZambezi, ihe kaku na omwiidhi. Iimuna yandje otayi ka sa po, otashi kwatha shike? Onda kala nokuninga omayindilo iikando oyindji ihe ihandi piti mo, omolwashike?” Ta nyenyeta ngaaka. Ndeitunga okwa ti, okwa kala noku ulwa kutya ye “omuzai-zai”, ashike mboka ya kala noku mu keelela ompito yokumona evi, “Kalunga na kale pamwe nayo, oshoka kayeshi shoka taya ningi’. “Sho tandi popi evi, itandi popi olukalwa lwandje naakwanezimo yandje, ihe otandi popi ehala mpoka andi ka kala sho nda thigi po iilonga, ano uunafalama,” ta fatulula ngaaka. Ta ti, mboka ye na oonkondo dhi vule dhaantu aakwawo, oyo ya kala taya longo ngaaka, uuna ya mono edhina lye, nena ohali imbwa mo mokati kaangoka taga ningi omayindilo.

“Natango onda hala okuyelitha kutya, itandi ti, ngeno kwa li ndi pewe evi oshali shamuongi, ihe okwa li nda hala oku li mona, okupitila momilandu dhili po ngaashi mboka ye gana, ye ga mono,” ta gwedha po ngaaka.

Ndeitunga okwa ti, hoka nakuye oshigongoti, omasiku 31 gaAguste sho taga thiki, okwa hala okudhanenwa okangalo “Freedom is coming tommorrow’’.

“Shoka tashi popiwa kutya otashi vulika ndi shune miilonga, nenge ndi gwendhelwe ko omimvo dhokulonga, iifundja iitokele, ngame onda pakela nale, nda manga nale, tandi yi,” ta ti ngaaka. Ta ti, etompelo ndyoka kutya omolwiipotha oshowo omaupyakadhi galwe ge li po inaaga pwa, kali na ongushu. “Oshike ngoka te ya pehala lyandje itaa tskile nokumana shoka nda tameke. Ngame onda manga nale oondjato dhandje, naangoka ta yi moompadhi dhandje na tsikile okulonga ngaashi kwa li tandi longo,” ta popi ngaaka. Ndeitunga okwa kumagidha ngoka tayi pehala lye, opo a ka longe ngaashi naana kwa li ta longo, nuundhinini, neyitulemo, nesimaneko oshowo noonkondo.

“Opo wu kale omuleli omwaanawa, owu na okukala wu na esimaneko nakehe gumwe, nuunene noshigwana, oshoka oshigwana osho she ku tulitha miilonga,” ta popi ngaaka.

Ta ti, na kale kuume koshigwana, kehe gumwe na kale e na onomola ye yopeke, opo oshigwana shi vule okulopota omaudhigu gawo oshowo iimbuluma tayi holoka kehe ethimbo.

Ndeitunga ta ti, kakukutu komatanga omupe na kale a tala aapolisi onga oyana, ne ya pukulule uuna ya puka, e teya kumagidha natango. “Ine hala oshilongo shika shi teke po, ihe nashi tsikilwe okulelwa ngaashi sha kala,” ta kumagidha ngaaka. Ndeitunga okwa ti, uuna wu li mombelewa, omiyelo nandhi mangulukile kehe gumwe, gandja omayakulo ngaashi taga pulwa.

Ombelewa inayi kala tayi tongola, ihe nayi kale yi na ombili nokugandja omayakulo kukehe gumwe, aantu ayehe oya faathana.

Ta popi kutya, sho alele oomimvo adhihe ndhoka, ita ndhimulukwa nando a pogolo, anyenga iinima yepangelo kaashili paveta. Otayi nondjila ye ya yela. 

Ta ti, okwa hala ombili ndyoka aadha poshipundi mpoka, naandjoka athigi po yi tsikile sigo aluhe.

“Opena mboka ya mono omapuko gandje, itandi ti inandi ninga epuko, ihe ngele shoka osha holoka otandi gandja ombili, mpoka nda longo nayi,” ta ti ngaaka.

Ndeitunga okwa ti, ota tameke oku endela kotondje, uukulupe wa thiki, onkene ombili nayi kale nAanamibia ayehe.

vkaapanda@nepc.com.na


2022-08-23  Victoria Kaapanda

Share on social media