WINDHOEK-Omwiimbi gwoongalo dhoHipHop, Ndondi Fredrick Kandjembe a tseyika nawa nedhina PhredGot1 osho a pititha oongalo dhe ndatu kointaneta, koDonlu Africa. 

Shika osha landula sho omwiimbi nguka a li a shainwa kehangano lyokutaandelitha nokutseyitha oongalo dhe pamwe noshitalenti she lyedhina Memory Talent Management (MTM). 

Oongalo ndhoka kwa li dha piti ongaashi Rapping for Girls, ongalo yohole tayi popi kombinga yaantu yaali ye li mohole. Ongalo ontiyali oyo ndjoka yedhina Grace, moka a kwathelwa okuwiimba kuNashwn, yoGospel notayi popi kombinga yeyitedhululo.

Omanga ongalo ontitatu yedhina Celebrate, ta kwathelwa kuSwartbaster. Oongalo ndhika dhi li tadhi pulakenwa nale nawa koyendji otadhi ka pita ishewe kooradio dhomoshilongo, notadhi ka kala moalbuma yaPhredGot1 yotango ndjoka ya tengenekwa yi ka kale ya pita kuyele nuumvo. 

PhredGot1 okwa tseyika nawa mehangano lyoongalo sho a li a ningile omuhikingalo Hilifa94 omikwelengendjo dhongalo yedhina “’Phred, You Got One’’. 

Omvula ya za ko omuhikingalo oye tuu nguka okwa li a pititha ‘’Boss Man’’, ongalo ndjoka ya li ya piti tango tayi ka kala moalbuma ye ndjoka ya tengenekwa yi ka pite nuumvo yedhina No Validation. Ongalo Boss Man, oya li ya tula PhredGot1 ponkatu ombwaanawa moka oye a li omuhikingalo a imba ongalo ndjoka ya kala nokutalwa shinene koDonlu Africa. 
PhredGot1 onkene ta tsikile nokushanga omaimbilo ge, osho woo okukokitha oongalo dhe, nokwa kala nokulonga pamwe naaningi yomikwelengendjo ooyakwawo ngaashi Mansion, MotionTheProducer, nelalakano lyokudhunga oalbuma ndjoka ya tengenekwa tayi ka kala ya dhenga mbanda.

PhredGot 1 ngoka e li ta ka thanekitha uuvidio woongalo dhe komasiku gokomeho, otawu ka mona ompito ombwaanawa okutseyithwa kehangano ndyoka lyoMTM, ndyoka lyi li lya tula uukuni kumwe noSomeSong Studios, ndjoka yi li ye shi gamena moGhana, nelalakano lyokuthanekitha uuvidio waahikingalo Aanamibia wu li pamuthika gwopombanda.  
Ehangano olyo tuu ndyoka ohali tula oongalo dhAanamibia ponkatu dhi vule okudhanwa moGhana.