Hilma Nakanduungile 

OSHIKUNDE- Aanasikola ye li 120 mboka ye li mompumbwe poskola pOshikunde Combined School, moshitopolwahogololo shaShikunde mOhangwena oya pewa oongaku dhodalaha kongeshefa yoRani Group oshiwike shika.

Oongaku dhoka odhi na ongushu yoN$14 000.

Omakwatho ngaka oga gandjwa konima sho onkundana yompumbwe yaanaskola mbaka yi ihanene komalungula, iiwike ya piti. Ta popile ko oRani Group of Companies pethimbo a gandja omagano, omunani gwoRani, Ali Dahrani okwa ti, ohashi mu pe ombili yokomwenyo nosho wo enyanyu uuna a topola okashona hoka e na naamboka ye li mompumbwe.

“Ohashi nyanyudha ndje noonkondo uuna tandi topola shoka nda yambekwa nasho, naamboka ye li mompumbwe, na unene tuu sho pwaa na omangambeko. Ngame wo omuvali, onkene uuna aanona ye li mompumbwe, ondi uvite ko lela shoka taya pitile musho,” Dahrani ta ti ngaaka.

Ta indile aakuthimbinga ayehe melongo yi imange kumwe opo ya kondjithe omashongo ngoka ga taalela okano okaNamibia, ko ku kwashilipalekwe kutya aanaskola oye li monkalo yi li nawa.

“Elongo oshinima sha simana noonkondo. Ngele otwa hala okulwitha omashongo ngoka ga palamena oshigwana monena ngaashi oluhepo, okwaa na iilonga nayilwe, natu kwashilipaleke kutya otwa gandja elongo lyongushu,” Dahrani ta ti ngaaka. Ongeshefa yoRani oyu uvaneke wo okugandja uupakete wu li 100 woombapila dhokuninga ookopi koskola oyo tuu ndjika, kongushu N$ 45 000.

Pethimbo a taamba ko omagano, ngoloneya gwaHangwena, Walde Ndevashiya okwa pandula oRani Group sho ya tondoka onkugo yaanaskola mbaka.  Ndevashiya ta indile wo aanaskola ya kwate nawa omakwatho ngoka ya pewa, yo yi ilonge nuudhiginini.