Commissioner wopolifi moshitukulwa shaShana Naftal Lungameni Sakaria okwa kumaida ovakalimo womolukanda Oshoopala mOshakati opo va longele kumwe mokulwifa oimbuluma molukanda lavo.
Okwa ti oshiwana nashi kala she li unganeka meengudu dokutaata ookalyamupombo, noku va manga ndele tava lopotele opolifi.
Okwa ti olukanda Oshoopala olo limwe mu hadi ovanhu va ninga oihakanwa yokunyekwa omaliko avo koolyamupombo.
Edi Sakaria okwe di popya Etine pefimbo a ninga omutumba novakalimo vomolukanda omo.
Okwa ti ombelewa yaye otai ka tofa mo olukanda laHamunghambya kwali, olo paife tali ifanwa Oshoopala shaashi omo unene mu na oumbudi wokuteya omaumbo nokunyeka ko omaliko ovanhu u li pombada.
“Ka leni muna eenomola deengodi dopolifi efimbo keshe. Oimbuluma nai lopotwe pefimbo opo opolifi i kale ya fika pefimbo,” Sakaria ta ti.
Okwa weda po ta ti opolifi otai twikile noku ninga oshikonga molukanda omo nelalakano okulwifa oimbuluma noku kalekapo eameno loshiwana.
Oshivike sha dja ovalumenhu 17 ova kwatwa po pefimbo loshikonga shokulwifa oimbuluma molukanda Oshoopala.
Ovalumenhu va kwatwa po omwa kwatelwa ovo va kala tava kongwa kopolifi noshoyo ovo ve li moshilongo shihe li papitikilo
Efiku olo opolifi oya kwata ko yo oinima ya yooloka ya vakwa ngaashi oTv, eekompiuta, eengodi dopeke omanga vanhu vamwe ova hangika ve na oilwifo ngaashi eembele, eendjebo nomakata a holekwa koshi yeembete noha longifa oufiku ngeenge tava ka nyeka ko omaliko ovanhu.
Pefimbo lomutumba ovakwashiwana ova pula opo va pewa oshitaashi shopolifi molukanda lavo noshoyo ovapolifi va kale tava ningi oikonga efiku keshe unene tuu efimbo loufiku.
“Otwa pumbwa opolifi molukanda letu shaashi paife ina tu manguluka vali ngeenge atu tudi koilonga kwa toka,” omukwashiwana ta ti.