Tuulikki Abraham

Lüderitz – Ovanhu ve li omilongombali moLüderitz ove li ve lipyakidila nokutunga omaumbo avo okupitila moprograma yehangano loShack Dwellers Federation, ehangano lokutunga omaumbo kovanhu ovo ve na oiyemo yopedu lela moshilongo.
Ambrosius Johannes oku li umwe womwaavo ve lipyakidila nokutunga omaumbo avo okupitila moprograma ei. Ota tumbula kutya okwa pandula eshi e li omunelao noku li umwe womovanhu omilongo mbali ovo va waimina ehangano loShack Dwellers Federation, va landula omilandu dehanga, nova pewa oshimaliwa kehangano opo va dule okutunga omalukalwa avo molukanda loArea 7 moLüderitz.
Pefimbo Kundana a talela po onhele opo tapa tungwa omaumbo oshivike sha ya, okwa hanga ovatungi ve lipyakidila. Omaumbo e li anhe okwa yeluka po lela, omanga omaumbo e li omulongo naahamano e liwe pehovelo lela. Omukwatakanifi woShack Dwellers Federation moshitopolwa sha//Kharas Rosalinda Hendricks odula ya ya okwa li e ya okuyandja omauyelele kovanhu ve li 20, ovo kwa talika kutya ottava dulu okupewa oshimaliwa kehangano, opo va tunge omaumbo e va yeleka modoolopa yaLüderitz tava pitile momulandu woFederation, ovanhu ovo, ovo nee va hovela okutunga omaumbo odula yoneudo.
Molukanda loArea 7 moLüderitz omwa tungwa nale omaumbo okupitila moprograma oyo tuu ei e li 20 konima yeedula nhano da ka pita. Oilyo ihapu oye litula mo mokukufa ombinga. 
Veno Munung oo naye e li umwe womovakwatelikomesho  voFederation moLüderitz, okwa pandula elelo lodoolopa yaLüderitz eshi le va tulila po omayakulo taa pumbiwa, ngaashi ominhino donyata oshoyo olusheno. Mununga okwa tumbula kutya yee onga e li umwe womwaavo va mona ouwa moFederation modula 2013, ova li ashike va tunga omaumbo avo pehe na omayakulo. Nomayakulo oo taa pumbiwa ove a pewa odula ya ya.  
Mununga okwa tumbula kutya, voo onga ve li oilyo yehangano loShack Dwellers, ova pandula neenghono kelelo lodoolopa yaLüderitz nombelewa yoshikandjohoololwa sha!Nami#nus, eshi ye va yambidida  ya yandja oukefa volusheno oshali, kovanhu ve li 9.
 “Ondi na eindilo la yukilila ovanhu ovo ve na oiyemo ishona. Kashi na kutya, oho landifa okapana, ile ohowapaleke meumbo, shima ashike hokendabala opo u mone okamaliwa, ndele owa hala okutunga eumbo loye,  ila ashike kufye, tu ongaleni, ohatu ongala Osoondaha keshe, potundi 15h00.” Ta tumbula ngaho.
“Elelo lodoolopa yaLüderitz ole tu pa eenhele di li 102, omaumbo e li 20 okwa tungwa nale, omaumbo e li 20 oo e lipyakidilwa  nokutungwa paife.  Eindilo lange olo eli kovakalimo vomoLüderitz kutya, endelela uuye uninge omunelao womwaavo tava ka ya mehangano eli, nokupewa omhito, uka tunge eumbo loye kondado i li pedu, peenhele odo dahupako dihena oovene dili 62. ” Mununga osho otumbula.