New Era Newspaper

New Era Epaper
Icon Collap
...
Home / Shalyefu otaka yandja edu kovanhu ve na oyuuyemo ili pedu

Shalyefu otaka yandja edu kovanhu ve na oyuuyemo ili pedu

2021-11-25  Festus Hamalwa

Shalyefu otaka yandja edu kovanhu ve na oyuuyemo ili pedu
Top of a Page

Mayola a hololulwa wodoolopa yaNgwediva Taarah Shalyefu okwa ti elelo lodoolopa yaNgwediva otali ka yandja edu kovanhu ve na oyuuyemo ili pedu opo va dule okukala va tunga omaumbo avo.

Shalyefu okwa ti ombelewa yaye otai ka tale koshikumungu shomhumbwe yedu la pumbiwa koshiwana opo oupyakadi wedu u kale wa kandulwa po.

Edi Shalyefu okwe di popya Etivali pefimbo kwali a hololulwa a twikile oku lela onga mayola wodoolopa yaNgwediva lwoshikando oshitivali.  Ta ti ombelewa yaye otai ka longa noudinini opo i kwashipaleke kutya ovakalimo vomOngwediva ova pewa omayakulo elixwa po.

Mayola okwa ti ota ka lalakanena okuyambula po odoolopa yaNgwediva, okukala a kale ka po oukoshoki modoolopa nokuxwaxwameka oshikondo shoipindi ikale tai ende nawa.

Okwa ti ookansela va hololulwa melelo lodoolopa yaNgwediva nava kale tava longele kumwe opo va dule okulonga nondjungu nokukala tava yandje omayakulo a wana kovakalimo.

“Ombelewa yange oye shipondola okuyandja omayakulo kovakalimo nokutula moilonga eepoloyela dihapu moule weemwedi nda pita ngaashi okutunga omapaandanda omeni lodoolopa, okulonga omatale onyata nosho tuu omayakulo makwao a yooloka,” Shalyefu ta ti.

Okwa kunghulila ovakalimo vomodoolopa yaNgwediva opo va twikile nokukala tava futu oifuta yomayakulo shaashi eshi otashi yandje omhito kelelo lodoolopa opo li kale tali eta omayakulo taa yambula po odoolopa.

Okwa weda po ta ti oshiwana na shi twikile okukala sha katunhilwa ovenda yombuto yoCovid-19 opo shi kale shili meano lawana.

Omupedu mayolo Ulalia Katonyala naye okwa vali opo a ya kule ongaa omupedu mayola lwoshikando oshitivali, omanga oilyonguduwiliki, omunashipundiwiliki, noilyongudu yookansela oya hololulwa. fhamalwa@nepc.com.na


2021-11-25  Festus Hamalwa

Share on social media
Bottom of a page