Omupopiliko wopolifi moshitukulwa Erongo Inspector Ileni Shapumba okwa ti ovanhu nava kale tava lopota oimbuluma pefimbo opo opolifi i kale ya ninga eenghendambala diva dokukala ya kwafela oshiwana.

Okwa ti osha fimana ngeenge oimbuluma tai lopotwa pefimbo shaashi eshi oha shi kwafele opolifi opo i kale ya ninga omakonakono omendelelo.

Shapumba okwa ti opolifi moshitukulwa Erongo oye lilongekida efimbo keshe  oku yakula oshiwana nokukwashipaleka kutya oimbuluma oya shuna pedu.

Okwa ti unene tuu pefimbo eli lomatango manene oshiwana na shi kale  shili oupafi efimbo keshe shaashi okwa didilikwa efimbo eli ookalyamupombo hava kala tava tula ovanhu mokatoo omanga vamwe ohava  teya omaumbo ovanhu ngeenge va kofa ile va dja po.

Shapumba okwa kunghulila oshiwana opo shi kale shina eenomola dopolifi efimbo keshe opo shi kale tashi lopotele opolifi kombinga yoimbuluma momidingonoko davo.

Shapumba okwa ti opolifi otai lalakanene yoo okutula po eameno pomaumbo ayeshe aa di ovakulupe modoolopa yaSwakopmund naWalvis Bay opo ku kelelwe ovakulupe va ha ninge oihakanwa yokulongelwa ominyonena shaashi okwa didilikwa ovakulupe va ninge oihakanwa yokukanifa omaliko avo.

Okwa ti ovanhu na va kale va tonatela omaliko avo ngaashi eetuwa nokukala tava fiye po omunhu ou ta kelele pomaumbo avo ngeenge tava ka pashiyona.

Okwa weda po ta ti ovanhu na va twikile okulifa komilandu doCovid-19 nokukala yoo va katunhilwa opo ku kelelwa etandavelo lombuto.

“Natu longeleni kumwe opo tu kondjife oimbuluma moshitukulwa Erongo,” Shapumba ta ti. – fhmalwa@nepc.com.na