Etango kalya li lya pitila aafuthi ye li yahamano mboka kwa li ya ponokele Aachina moshitopolya shaHangwena noku ya yuga iimaliwa mehuliloshiwike.

Omakanda ngoka goonyala oonde anuwa oga mangwa meni lyominute omishona konima yoshiningwanima.Sha ikolelela kepeko lyopolisi Omaandaha, aalumentu mboka anuwa okwa li ya ponokele Aachina mOshikango, pethimbo kwa li yu uka mohotela yimwe noku ya yuga oshimaliwa N$60 000.

Otaku hokolowa kutya aalumentu mboka okwa li ya nuka mokahuato kokaToyota Corola okatokele sho ya ponokele Aachina mboka.

Opolisi oya ti, oya li ya lopotelwa mbala kumwene gohotela mpoka pwa ningilwa ishiningwanima. 

Aaafekelwa okwa li ya ningi omupya sho ya tsakanekwa kopolisi ndjoka kwa li tayi hingi mopate.

Ohauto ndjoka okwa li ya kankamekwa naalumentu mboka okwa li ya mangwa. 

Opolisi onkene tayi tsikile okukumagidha oshigwana kaashi kale we niimaliwa oyindji komalutu.

Oshiningwanima shimwe inaashi faathana, opolisi moshitopolwa shaKhomas oyi li molukongo lwaalumentu yaheyali, mboka ya yi ontuku noshimaliwa N$100 000.

Sha ikolelela kepeko lyopolisi oshiningwanima osha holoka komatango gEtitano kOkuryangava moWindhoek.

Otaku hokololwa kutya omulumentu ngoka gomimvo 32, a li nayakwawo yaali omanga taya gongele iimaliwa koositola yedhina Top Score, oya li ya ponekelwa kaalumentu yaheyali ya homata oondjembo.

Opolisi tayi ti aafuthi okwa li yaha elola lyohauto yomulumentu ngoka, omanga inaaya ya ontuku noshimaliwa N$100 000 koomuma.

Otaku hokololwa kutya aafuthi mboka kaaye shiwike, o kwa li natango ya faalele ongondhi yo peke yoIphone 13, noondjembo mbali.

Opolisi otayi indile moshigwana kehe ngoka ena uuyelele moshiningwanima shika a lopotele opolisi popepi naye