Minista gwomindhingoloko iihwa nomatalelepo, Pohamba Shifeta, okwa dhimbulukile esiku lyuuthembo womuntu opamwe noontauki dhaAngola, Etitano lyaziko.

Shifeta okwali atopolele Aangola ya gongala pEtunda, moRuacana moshitopolwa shaMusati niikulya oshowo ikwathithi yilwe.

Miista okwali afatulula kutya ayihe mbyoka kwali ya topolelwa aashindalongo, okwali ya gandjwa ko United Nation Development Programme (UNDP) okupitila mooproyeka dhoku hwepopaleka onkalo oshowo okukandulapo ondjala.

“Aantu mboka oyataaguluka oongamba, ye ya okukonga uuhupilo omolwa ondjala ondhigu ya ningi ethimbo moshilongo shawo. Aantu mboka kayena iiyemo, yo kaya mona omakwatho aluhe okuza kepangelo,” ta popi ngaaka.

Shifeta esiku ndyoka okwali apandula Ngoloneya goshitopolwa shaMusati Erginus Endjala, molwa olukeno niilonga akala ta ningile oontauki ndhoka.

“Ngoloneya okwakala tasile oshimpwiyu aantu mboka, noku kwashilipaleka kutya itayasi ondjala omanga ya taalela onkalo ondhigu,” ta pandula.

Minista okwali wo adhidhilike kutya aantu yena omalukalwa kookengamba ohaya ningi iihakanwa yomaupyakandhi haga holoka omolwa omalunduluko gombepo, mwakwatelwa omafundja, ondjala no sho tuu.

Endjala okwati, okuza esiku lyotango oshigwana shoka sha thiki mpoka, oombelewa dhaNgoloneya odha kala tadhi kambandhala okukonga omakwatho, okuyambindhindha aantu mboka opo ya kale yeli monkalo ohwepo.

“Epangelo lyetu, itali vulu okugwanithapo oompumbwe dhawo adhihe, nonando twa kala nga ta tu pula natango omakwatho okuza mpeyaka naa mpeyaka,” ta fatulula ngaaka.

Ngoloneya okwali a pula wo natango, aanona mboka ya yambindhindhwe nelongo, omolwa uunona mboka wu vule 1 500, tau pumbwa embo no pena.

Aangola mboka ye vule 3 700 mongaashingeyi , oya tindi okushuna koshilogo shawo, nkene ya thikile moNambia muMalitsa nuumvo, taya kongo uuhupilo.

Endjala okwati, onkalo yaantu mboka otayi ende yuuka kuuwineyi oshoka, omwaalu gwawo natango otagu ende guuka pombanda.

Maria Sao ngoka ta ti, ngaashi omvula yili pokuloka, otashi vulika, akwate kompepo yokushuna, opo akalonge mepya lye.

“Otuli monkalo ondhigu, onkene, itatu kiidhidhimikila okulala mpaka ta tu lokwa nondjala, omanga tuna omagumbo nomapya , koshilongo. Ashi vulika tuka tidhwepo komvula,” ta popi ngaaka.

– vkaapanda@nepc.com.na