Omunangeshefa gomonooli atseyika nawa nedhina Martin Shipanga okwali agandja omagano gokili kaakulipe moshikandjohogololo Okankola.
Shipanga okwali agandja omagano
gomakumbatha geli 75, esiku kwali atumbulwa pambelewa onga mwene gomukunda Onandjamba moshitopolwa shaShikoto. Omunangeshefa ngoka okwali apingana nakusa Prince Toteya Elifas ngoka ali ahulitha momuvo 2019. “Sho nda hogololwa ndi kale mwene gomukunda nguka Onandjamba, inandi hogololwa uufuli, ihe ondina okulonga nokulongela kuumwe noshigwana shandje, okuhuma komeho nokuyumbalapo omukunda gwetu,” ta po pi ngaaka.
Ta ti, iilonga ohai kala iipu, una aantu ayehe taya longele kumwe nohole, nombili oshowo nomilandu ndhili po.
Shipanga ta kwashilipaleke kutya otakala ta ningile oshigwana she iigongi, okuuva oshowo okukundathana uupyakandhi wa taalela omukunda gwao na nkene yena okuwukandulapo.
Omuleli omukuluntu gwopamuthigululwakalo Vilho Kamanja esiku ndyoka okwa tothamo kutya elelo lyopamuthigulwakalo lyaOndonga olyina omikunda ndhili 108 kaadhina ooyene yomikunda.
“Aakalimo yomukunda Onandjamba otaya ligola, oshoka oya mono omuleli, oyendji ka yena aaleli momikunda dhawo,” ta popi ngaaka.
Ta fatulula kutya okumona omuleli ngoka hauvuko noku kandulapo omakemo goshigwana kashi shi oshipu, sho shoka omikunda ondhindji mOndonga kaandhina aaleli.
Kamanja okwati, oshigwana nashi hulithepo okupopya nokutaandleka omapopyo kutya omukwanilwa Fillemon Shuumbwa Nangolo, ohahogolola aantu ye, mboka ahala ya ningi ooyene yomikunda, ta ti, shoka kashi shi sho shili.
Minista gwomakwatathano nomaungomba Peya Mushelenga, okwali akumagidha Shipanga a kale ta pula ekwatho aluhe uuna ta nyengwa.
Mushelega okwali wo a halele Shipanga uuwanwa mokulela kwe okupe. “Kala melongelo kumwe ewanawa noshigwana shoye, nokushilela wo nawa,” ta kumagidha ngaaka.