Omupopiliko wehangano lokuyandja ohonde loNamibia Transfusions Service of Namibia (NamBTS) Titus Shivute okwa ti ovanhu nava ye momwaalu muhapu opo ka yandje ohonde shaashi oipangelo moshilongo oya talela eshongo linene lohonde ina i wana.
Okwa ti moule weemwedi nhee da pita ovanhu ova kala tava ende nakashona okukayandja ohonde naashi osha eta opo oipangelo i kale momhumbwe yohonde.
Shivute okwa yelifa ta ti eshi oshi li eshongo linene la talelwa koshilongo shaashi ovanhu ovahapu va pumbwa ohonde, ashike kai po vali.
Meenghundafana a ninga naKundana Etivali Shivute okwa ti otai indile oshiwana opo shiye momwaalu muhapu shi ka yandje ohonde shaashi oku yandja ohonde osha fimana unene shaashi otashi xupifa eemwenyo dovanhu veli momhumbwe yohonde.
Okwa ta ti ohonde tai ka yandjwa koshiwana ohai kwafele ovanhu vena omikifi da yooloka ngaashi okangela, pefimbo oomeme tava pulumuna, omunhu ngeenge ta tandwa nosho tuu omikifi dikwao.
“Ehangano letu lohonde ola kwashipaleka kutya keenhele
adishe do kuyandjela ohonde okwa tulwa omilandu doCovid-19 noikwafifo ya wana yokukelela ovanhu va ha kwatwe kombuto,” Shivute ta ti.
Okwa ti ehangano lohonde okwa li la tameka nokuninga oikonga meefikola opo ovanafikola navo va kufe ombinga mokuyandja ohonde ashike ina li shipondola okukala la mona ohonde ya wana eshi ovanafikola va kala tava ende nakashona.
Okwa ti omandiki ayeshe okuyandjela ohonde moshilongo onghee nga taa twikile nokulonga Omaandaxa fiyo Etitano.
“Olomakaya ohatu ka kala tuli pendiki lomangeshefelo loMarura Mall mOngwediva, Etitano otuli kuGwashamba Mall omanga Olomakaya otuli koSwakopmund. Onghee oshiwana osha teleli ka opo shi holoke momwaalu muhapu,” Shivute ta ti.
“Ngeenge owa i moipangelo paife oto hange muna ovanhu vahapu va pumbwa ohonde ndele kapena sha ohonde yokuyandja kovanhu veli momhumbwe,” Shivute ta ti.
Shivute okwa ti omauyelele amwe elixwapo ohava handje keeradio da yooloka do moshilongo nokomapandja avo okomalungula.
“Oshiwana na shi kale tashi topolafana ouyelele kombinga yefimano lokuyandja ohonde opo ovanhu va kale vena eudeko la wana,” Shivute ta ti.
Okwa kunghulila oshiwana opo shi twikile nokuliufa komilandu edi da tulwa po dokukelela ombuto yoCovid-19 efimbo keshe.
– fhamalwa@nepc.com.na