Omukwaniilwa gwOndonga okwa ulike aaleli taya pingana aaleli mboka ya hulitha omwedhi nguka. 

Fillemon Shuumbwa Nangolo okwali a kutha etokolo ndyoka meendelelo, okuthitika oombululu ndhoka, melelo lyomuthiguluwakalo gwOndonga.

Mboka ya ulikwa, elenga enene lyaNdangwa John Walenga ngoka a ulikwa oye a ninge omunashipundi melelo. Walenga okwa yi peha lyelenga enene lyoshikandjo shaAmuteya, Vilho Kamanya ngoka a hulitha oshiwike shazi ko. 

Walenga okwali a pewa Ambasanda Eddie Amukongo oye a kale omupeha gwe. Muuleli gwokoshikandjo shaAmuteya, Nangolo okwa ulike Amukongo oye a ninge elenga enene lyopokathimbo, tali kwathelwa pakathimbo kuSimson Nghiteka.  

Immanuel Shipanga okwali a hogololwa a ninge elenga, ta lele oshikandjo Ombulu, a ya pehala lyelanga Kashona kaMalulu ngoka a hulitha oshiwike shazi ko. Omupeha gwaShipanga oIsrael Nkondi.

Nangolo natango okwali a ulike Kadhila Ngalangombe a ninge omupeha momukunda Onalusheshete ta pingena po omupeha ngoka ali alele ethimbo Johannes Shondili Amutenya.

Omukwanilwa okwali natango a gwedha ko kiinakukwanithwa ya amushangandjayi gwelelo Frans Enkali, a ninge omupopiliko gwOndonga.

Moonkundathana naKundnana, Enkali okwa ti Elelo lyOndonga, pamwe nOmukwaniilwa Nangolo, oya dhengwa pevi komaso gomalenga gawo. Oya gandja omahekeleko omanene koonakuthigwapo, aaselekandhi, aanona, aatekulu, nomazimo agehe nosho wo aalelwa yomalenga ngoka.

Kamanya okwa fumbikwa oshiwike sha zi ko omanga Malulu a hulitha Etiayali lyoshiwike sha zi ko, omanga elongekindho lyefumbiko lyaMalulu lyili metifa no tali ka tseyithwa komasiku gokomeho. 

– vkaapanda@nepc.com.na