RUNDU – Mubusisi wasikiliti sa Kavango ya Upa Bonifatius Wakudumo nakupile baituti ni maticele kwasikolo sa matente sa purojekiti mwa Rundu kubeleka katata nihakuna ni lisitataliso. Wakudumo napotezi sikolo sa purojekiti viki yefelile, kuyo nyatisisa ze ezahala, teñi baituti balitopa za lobapeli, lobañwi ni lishumi basweli kufumana lituto kasamulaho bapalelwa kufumana sibaka mwalikolo zeli teñi mwa Rundu. 

“Nitile kutobona mayemo amuli kuona, hamoho cwalo nikuto mi susueza kuli, mayemo nihali cwalo, muswalise. Sina hanibulelanga, hakitaba yakuba ni sikolo sa miyaho yeminde, kono kize ezahala mwamakilasi. Kacwalo kapa kimwa tente kapa fañandaleza, haiba uticele yana ni ciseho ni lyano ukatisa miselo yeminde,” nekubulezi Wakudumo.

Mubusisi naize makilasi aka yahiwa cwanuñu. “Lusweli kubeleka katata kubona kuli muyahi wataha ato kala kuyaha,” Wakudumo nabulelezi maticele bane bailo shimbululwa kwalikolo zeñwi mwasikiliti.  Ñohola likolo la tuto neli filwe masheleñi alikana bolule bamashumi amabeli, kuli kuyahiwe makilasi amañwi mwalikolo, kono masheleñi ao aisizwe kwakuyaha makilasi fasikolo sesinca kutusa baituti babakenela mwamatente. 

Kalulo ya masheleñi ao, ika sebeliswa kuyaha makilasi amanca kwasikolo sa litopa za kwatasi sa Siguruguru mwakoponi ya Tumweneni, mbowelaupa kwanda tolopo ya Rundu.