Aakuluntu itaya kuutumba we naanona momagumbo ye ya lombwele noku ya fatululila esimano oshowo uuwanawa womithigululwakalo, sho shoka aanona ya landulwa komipya.
Ndhoka odha popiwa komukwanilwa gwoshitunda shOndonga Fillemon Shuumbwa Nangolo Etiyali, pethimbo lyendhimbuluko lyomatalelepo muuyuni, ndyoka kwali lya ningilwa mOmuthiya moshitopolwa shaShikoto.
Esiku ndyoka ha li ndhimbulukwa aluhe muuyuni momasiku 27 Sepetemba, nuumvo olya ndhimbulukwa kohi yoshipalanyolo okundhilandhilula omatalelepo.
“Sho osho shoka to andha aanona yetu taya tidhwa iilonga konima ya pogola kashona, inaaya gandwa nenge ya pukululwe oshoka oya landulwa komupya,’’ ta popi ngaaka.
Ta fatulula kutya omuthigululwakalo ogwa simana onkene oguna okusimanekwa noku kalekwa po uuna tagu longithwa. Ta popi ta ti, omuthigululwakalo natango otagu vulu oku etapo oshimaliwa, momikalo dha yooloka, uuna aantu ya tameke okulongitha uunongo wawo.
‘’Natu tameke okulongitha oompito ndho pamuthigululwakalo okuetapo oshimaliwa. Tandi gandja oshiholelwa shoku ninga omatiti, iindhano niikwawo oyindji,’’ ta kumagindha ngaaka.
Nangolo ta ti, inamu ndhina, ihe simanekeni noku gwanitha po ayihe yomithigululwakalo.
Omupevi minista Heather Sibungo omanga inaalesha omushangwa gwe gwesiku esiku ndyoka okwa popi ta ti, okuuvite nayi sho aaleli, aanapolitika inaaya gongala esiku ndyoka.
‘’Esiku ndika olya simana noonkondo, onkene aaleli oyena okukala ya holoka opo ya ulike nokusimaneka esiku nyoka,’’ ta nyenyeta ngaaka.
Ta ti, omatalelepo ogo gamwe go mwaambyoka tayi humitha komeho eliko lyoshilongo, onkene ngele otaga longithwa momukalo guli mondjila, otagaka tula oshilongo shika ponkatu yilwe ombwaanawa, ndyoka tayi ka kutha oyendji moluhepo.
Omugandji gomauyelele muministeli womindhingoloko iihwa nomatalelepo okwa ti, oya li ya hogolola okundhimbulukwa esiku ndyoka mOmuthiya oshoka oya ndhindhilike kutya oyendji oya ndhimbwa omahala goku talelwapo moshitopolwa shaShikoto.
‘’Oshitopolwa shaShikoto oshina omahala ogendji ngoka ga pumbwa okuyambulwa po, opo ga tameke okutalelwa po ngaashi shina okukala,” ta popi ngaaka.
Ta ti, shoka otashi ka yambindhindha aakalimo yomoshitopolwa shaShikoto, momukalo gwehumo komeho oshowo ekoko lyeliko moshitopolwa.
Ta tothamo omahala ngaashi Othithiya oshowo ehala lyashiwika nawa Etosha. vkaapanda@nepc.com.na