Aalilasa oyendji ya tumu omatumwalaka gomahekeleka kaakwa Nujoma naakwa Asino, oya hokolola kuku Sophia Asino onga ali omukwambepo ngoka a longele Kalunga nondjungu.
Sophia Asino, ngoka a valwa Sophia Naapopye Gwamundani yaDaniel yaNujoma okwa valwa momasiku 31 Kotoba 1936 mOkahao.
Okwali gumwe gwomaanona yaTatekulu Daniel Nujoma naKuku Helvi Kondombolo, nokwali okandenge kOmukokoli Presidente Sam Nujoma.
Asino (84) okwa hulitha iiwike ine ya pita, moWindhoek, konima sho a kwatwa koshivu shoCovid-19. Otaku hokololwa a ninga oshihakanwa shombuto ndjoka pethimbo a li a ya koWindhoek a ka pangwa ongolo ndjoka yali tayi ehama. Okwa fumbikwa ohela momukunda gwaandjawo mEtilyasa moshitopolwa shaMusati.
Mboka ya tumu omatumwalaka gomahekeleko oya kwatela mo Omupresidente Hage Geingob, Omupreseidente omukulu Hifikepunye Pohamba, Omukuutumbike gwegumbo lyopashigwana  Professor Peter Katjavivi, Omupanguli ndjai Peter Shivute, omupevi-presidente Nangolo Mbumba, omupilima gwoshilongo Saara Kuugongelwa Amadhila noshowo oombelewa dhaakalelipo shilongo yaIndia oshowo yaCuba. 

Ondjokonona yakuku Asino otayi ulike kutya okwa hokanwa momumvo 1963 komuholike gwe Edward Itula Asino, sha ningilwa megongalo lyaandjawo mOkahao Elcin Church, noya tungu egumbo lyawo mEtilyasa. Momumvo ogwo tuu ngoka okwa tameke okulonga onga omulongi gwoSub A (Grade 1) pEtilyasa Combined School mpoka pwali wo hapu longo omusamane gwe. Aahokanathani mbaka oya pewa omagano mondjokana yawo gaanona yahetatu –aamati yatano, naakadhona yatatu –omumati gumwe okwa hulitha nale. 

Omolwa omatilitho ngoka ga kala noku ningilwa aanegumbo mbaka komakakunya pethimbo lyuukoloni, omusamane gwe Edward Asino, okwa thigi po egumbo lye e ta yi muupongekwa. Meme Sophiya naanona oya kala po taya li taya pi, ashike oya kala ngaa taya kwathelwa kongeleka. Konima yethimbo, kuku Sophia naanona ya hamano, oya yi wo koAmerica hoka okwa ka li tate Edward. Oya kala ko uule woomvula hetatu. Gumwe gwomaanona ina ya koAmerica, ashike okwa yi koAngola aka wayimina iita yekongdjelo manguluko. Okwa kala hoka a kala sigo opemanguluko
Mo1989 aanegumbo lyaAsino ayehe oya galukilwa kegumbo. Meme Sophia natate Edward oya shuna ishewe poskola pEtilyasa mpoka ya longo sigo ayehe ya thiki mopenzela. 

Tatekulu Edward okwa hulitha mo2015.
Kakele kiilonga yoskola, kuku Sophia okwa kala omuyakuli megongalo, omuwiliki gwotundi mbiimebeli, nokwa kala wo omuwiliki gwongundulwiimbo yegongalo. 
Gwamundani ina kala omunkundi, okwa kala ta ehama ongolo ethimbo ele, okwa pangwa eta kala po nawa. Esiku limwe okwa hakukilwa kuumvu uunene. Momamasiku 14 Aguste okwa hulitha. 
Okwa thigi ko aamwayina yatano, aanona ye ya heyali naatekulu 36.