WINDHOEK – Standard Bank oha tula mo ashike oshimaliwa meliko lyaNamibia okupitila maaniilonga ye, ye natango okwa tinda oku ya gwedhela, Amushangandjayi gwehangano lyaaniilonga yomoombaanga, Bank Workers Union of Namibia (BAWON), Thomas Muchima ta ti ngaaka. Ta popi niikundaneki mEtiyali, Muchima okwa gwedha po ta ti ombaanga oya tindi eindilo lyaaniilonga okupitila mehangano lyawo okugwedhela oondjambi dhawo noopeleenda 6,2 moshikakomumvo shiimaliwa sho2019/20, noya li ashike ya hala okugandja oopelesenda 5,2 ndhoka ehangano lyaaniilonga lya tindi.
Muchima ta dhenge omuthindo mpaka kutya movenisa yombaanga moshikakomumvo shiimaliwa shomumvo gwa za ko shoomiliona N$400, ombaanga oya gandja ashike koshilongo okupitila moondjambi dhaaniilonga osho wo moopolohalama dhawo dhokushunitha moshigwana, ndjoka ta ti kutya kehe ehangano olya pumbwa oku iyutha kusho.
“Nonando eliko tali ende tali shongola Standard Bank onkene natango ta ningi ovenisa novenisa ndjika onkene tayi zi mo moNamibia. Ihaya shuna iimaliwa yawo moNamibia noya ti kutya ohaye shi ningi nale okupitila moopolohalama dhokushunitha moshigwana,” ta ti ngaaka.
Okwa popi kutya eindilo lyawo lyegwedhelo  otali ka pula oomiliona N$40 okuza movenisa yoomiliona N$400 yoStandard Bank , ashike ombaanga inayi hala oshinima shika oshoka otashi ti kutya iipambuliko yawo otayi ka shonopala.
“Ohashi ende ngiini aaniilonga ya longele ooyene yiipambuliko, ashike aaniilonga oyo tuu mboka ya longa oshimaliwa shoomiliona N$400 inaya yalulwa,” Muchima ta ti.
Ta popi wo kutya onkatu ya landula okuhogolola ngela aaniilonga oya hala otula mo ekanka.
“Elalakano lyoBAWON niilyo yalyo kali shi okuya mekanka, ashike ngele otwa thindilwa kongudhi, itatu ki ipula we lwaali ashike otatu ka ninga omahololomadhiilaadhilo oshilongo ashihe,” Muchima ta ti. Ta pula wo ngele eyooloko lyopelesenda yimwe pokati koopelesenda 6,2 no5,2 otayi kanitha Standard Bank.
Standard Bank okwa pititha omukanda mEtiyali tagu ti kutya oopelesenda dhaaniilonga yombaanga ndjoka otaya ka mona egwedhelo lyoopelesenda 5,5 sigo 6 shi ikwatelela kiilonga yawo yomumvo gwo2018.
Tagu ti ngele oshe ya pekanka ombaanga oyi li komalwilo notayi ka kwashilipaleka kutya iilonga yawo itayi ka yiwa moshipala unene.
(NAMPA)