Ongudu yoSwapo oya yambidida ouministeli wouhaku nonghalonawa eshi ya yandja oikumbafa i li pongushu yoshimaliwa N$21 000. 

Oikumbafa oya yandjwa nelalakano opo ikale tai longifwa kovanaudu veli moipangelo ile komandiki oCovid-19.

Moshipopiwa shaye minista wouhaku nonghalonawa Dr Kalumbi Shangula okwa tambula ko oikumbafa ei nolupandu linene.

Shangula okwa ti oikumbafa ei otai ka topolelwa oipangelo aishe moshilongo opo i dule okulongifwa kovanaudu aveshe ava vakwatelwa meembete.

Minista okwa kunghulila eengudu dopapolitika opo di kale tadi kwafele epangelo mokukondjifa ombuto yoCovid-19, tashi pitile mokuninga oikonga yetunhilo lombuto yoCovid-19 shaashi eshi otashi kwafela opo ovanhu vahapu va kale va tunhililwa ombuto ei.

“Eengudu dopapolitika na di kwashipaleke kutya oda di xwaxwameke oshiwana opo shi kale sha holoka momwaalu munene opo shi katunhilwe, onghee eshi osho omukalo muwa atu dulu okulongifa opo tu shunife etandavelo loCovid-19 pedu. Otwa pumbwa oku longela kumwe opo tu yandje ehongo nghee sha fimana ngeenge omunhu a tunhilwa omukifi woCovid-19,” Shangula ta ti. Shangula okwa yelifa ta ti ouministeli wouhaku owa kala tau longo nelitulemo opo u kwashipaleke kutya oshiwana osha amenwa kombuto ei, onghee hano okwa denga omufindo ta ti ovanhu na va twikile oku liufa komilandu edi da tulwa po doCovid-19.

Minista okwa kunghulila yoo vali ovanailonga woundjolowele opo va kale vakwashipalekwa kutya ova tunhilwa ombuto yoCovid-19 shaashi ohava longo no vanaudu vayooloka, onghee okwa ti osha fimana ngeenge otava kala va tunhilwa tete.

Pefimbo ongudu yoSwapo tai yandje oikumbafa hamushanga womauyelele, yee okuli omukwatakanifi mongudu yoSwapo Hilma Nicanor okwa popya ta ti ongudu yoSwapo otai lalakanene oku shakeneka epangelo ondjilakati.  Nicanor okwa yelifa ta ti oikumbafa oya landwa noimaliwa ya dja meendjato doilyo yongudu yoSwapo yomoWindhoek, onghee okwa ti okwa pandula oilyongudu eshi ya yambidida ouministeli wouhaku.