Steven Klukowksi

KEETMANSHOOP – Ongundu yoLandless People’s Movement (LPM) oya li yi na oshigongi shawo shahugunina mOsoondaha moKeetmanshoop nomuwiliki gwawo Bernadus Swartbooi okwa li a lombwele aayambidhidhi kutya ongundu ye oyo ashike tayi vulu okufala Aanamibia komeho. “Otwa tokola tu ninge oshigongi shetu shahugunina moKeetmanshoop oshoka otwa itaala kutya Keetmashoop osho oshilando shokuumbugantu, nonando sha mbangolota,” Swaartbooi ta ti ngaaka.

Okwa li a uvanekele Aanamibia kutya esiku limwe otaya ka dhimbulula onkandangakla ya dhanwa koLPM. “Ndika kali shi ehogololo ngaashi shito,” ta ti ngaaka.

Swaartbooi ta ti ehogololo lyomEtitatu nali ka mangulule oshilongo kedhengelo lyondhi peho, ta ti oohandimwe mboka ya kala nokwiiyambapaleka uule woomula 30 dha za ko oya ninga Namibia oshinima shawo shopawumwene.

 “Natu taleni nkene aantu mboka ya hala omagumbo taaye ga tindilwa, aantu mboka ooyinakulu ya lwila emanguluko lyoshilongo,” ta dhenge omuthindo ngaaka

Okwa pula Aanamibia ayehe ya hogolole oLPM momahogololo gopaupresidnte nogomutumba gwopashigwana. “Otandi ka yamukula komakemo goluhepo osho wo gonkalo ya nika uupika nokupula evi osho wo okugandja oompito dhiilonga kaantu ayehe,” Swaartbooi tu uvaneke.

Ta ti omalunduluko ngoka ta gaka etwa po koLPM ngele oya hogololwa, omwa kwatelwa okugwedhela openzela yaakulupe yi ye pooNS3 000. “Otatu ka kala wo tu na elongo lyopombanda lyoshali.”
Ta ti kape na we ongundu yilwe yaa shi oLPM tayi vulu okukalela po oompumbwe dhaaNamibia nomalalakano gawo.