WINDHOEK - Efamilia lyomusame omukulupe gwomimvo 66, Philip David Kalumbu olya ti kutya olyi li momalimbililo sho mumwayina a kala omasiku ge li gaali ina nwa omiti dhe dhelondo lyombinzi, konima sho a kwatwa po kopolisi mOndangwa mOlyomakaya ga zi ko .
Gumwe gwomaamwayina yaKalumbu, Amos Kalumbu okwa hokolola kutya Kalumbu okwa ninga ethimbo ele e li momahepeko gomukulukadhi gwe Magdalena Isreal Nandago noyana mboka a li a monitha oshiponga sho ye mu ponokele nomakatana ee taye mu hahala iikando yi li ine kolutu oshikando shimwe, momutse iikando iyali omanga koonyala oshikando shimwe.
Ngashingeyi Kalumbu oku li modholongo moka a tandilwa ombooloha noshipotha she osha undulilwa komeho komasiku ge li 22 Kotomba naanguka oku li mondholongo sigo ethimbo ndika.
Shi ikololela komukwatakanithi gomakakonaakono giimbuluma moshitopolwa shaShana Deputy Commisioner Hilia Iipumbu, Nandago okwa patulula oshipotha sheningilomatilitho shoka a patululila omuholike gwe oshiwike sha ziko.
Oonzo dha inekelwa nawa kuKundana odha hokolola kutya Nandago okwa patulula oshipotha shoka sho a mono omusamene ta topola epya nuuthemba mboka a pewa kaaleli yopamuthigululwakalo yoposhikandjo shoka, ano ookapatashu.
“Omusamane ngoka konima sho a dhengwa kuNandago, Fiina, Magrita naLiina Kalumbu , okwali a tawuka mo megumbo ee ta kala a edhililwa kaamwayina. Nokonima okwa li a pewa uuthemba kookapatashu opo a topoleko oshipambu she,” osho onzo ya hokolola ngaaka.
Oya hokolola kutya inaya itaala kutya Nandago okwa ningilwa omatilitho shili oshoka okwa kala ethimbo ha dhenge omushungu, pwa li pe na oshikando shimwe nokuli ye mu dhenga ee taye mu file omavi momeho nomokana, taya tatula po omakende ge gokomeho ngoka a dhikile a pewa kundohotola sho a tugununwa omeho.
Amos okwa popya kutya yo ngashiingeyi oya tala ashike muKalunga ngoka iha kwatelwa ngele ta tenge oshoka mumwayina okwa kala nokuhepekwa unene komukulukadhi ngoka noyana, oshipotha oshi li natango momusholondondo gwiimbuluma mompangu yopombanda sha tegelela shi ka uvike natango muKotomba nuumvo.
Okwa hokolola woo kutya ke shi nee kutya mumwayina okwa nika oshiponga ngiini kaapolisi ngele okwa kulupa ye okwa lemana nale komadhengo gwomukadhi noyana ihe natango ota hatwa po ee ta tulwa miiketanga.
“Kalumbu ke na oonyala ndatu nawa oshoka odha tetwa ko nekatana sho a li a nkapwa koyana na ina nika oshiponga oshoka omunkundi. Ashike onda uva kwaamboka ya li po kutya okwa hatwa po kaapolisi mboka ye ya yaali, ee taye mu tula miiketanga nokumuundulagula. Shoka ndi wete kutya otashi gwedha ngashiingeyi komahepeko nokuululume mboka mumwameme a kala nokuya muule wethimbo ndyoka okuza omumvo gwa ziko,” osho Amos a hokolola ngaaka.
Okwa ti kutya yo oya uva nawa kutya Nandago noyana oye na elalakano lyokukutha po epya ndyoka oyo a yeke, na otaya ningi kehe shoka taya vulu opo Kalumbu a kale kee li momwenyo.