Omukulupe gomimvo 62, ota ti oomvula kuye kadhi na shoka ta dhiti, onkene oha kongo uuhupilo we mokuhondja oongaku ndhoka dha kankukamo nenge dha teka iithi.
Joakim Shitaatala ngoka a yambukile moAngola nokwa nokwe ya moNamibia omimvo 30 dha piti, ota ti nena oti ithana kutya ye Omunamibia, oshoka okwa mona uuthemba woshilongo.
“Onda kala nuunongo wandje okuza koAngola, okuhondja oongaku megumbo moka ndaza okwali ilonga ya kehesiku, onkene sho ndeya moshilongo muka, ka kwali nda mono nando ongeshefa yatya ngiika tayi ningwa,’’ ta hokolola ngaaka.
Ta popi ta ti okwali a tameke ongeshefa ye yoku hondja oongaku kEvululuko, hoka kwali pula ashike N$5 mongaku, ashike ookasitoma okwali ta dhi ende nawa.
Ta ti, ongeshefa oya tameke okukoka sigo a tembukile mondoolopa oshoka omo muna aantu oyendji, nngaashingeyi ohapula okuza pomilongo N$30, mongaku yimwe, sha ikolelela kwashoka shina okulongwa.
“Onda tameke okushiwika nawa oshoka ngele onda kwata ongaku yoye ya shoshoka, kayina we esiku yi zemo shapo ongoye toyi loloka,” ta ti ngaaka.
Ta ti mongaashingeyi ookasitoma odha ninga ondindji, mesiku ohandi longo oongaku dha thika 20 ongame awike. Oshoka onda kuta aanilonga paife ya yambindhindhindje, ohatu vulu okulonga oongaku 40 mesiku.
Shitaatala okwati mesiku oha vulu okuzimbuka N$1000 ngele okwalonga iitulamo.
“Ongeshefa yandje otayi ende nawa lela. Otandi pandula oshoka kehe esiku tandi zimbuka ohandi faalele omboloto yaanona yandje kegumbo, no handi vulu okukandulapo uupyakandhi woshimaliwa tau holoka,” ta popi ngaaka.
Ta ti, iilonga yokoonyala ihayi pula elongo lyomambo, ihe uunongo mboka wuna noonkondo.
Ta gwedhapo ta ti, iilonga mbika ohayi pula ashike oonkondo oshowo eyitulemo.
“Ookasitoma dhandje ondendhi simaneka oshoka omolwadho ndili nena mpaka, oshowo nda thiki ponkatu mpoka ndili paife. Otandi pandula natango mboka haya tuminendje wo ookasitoma uuna nda longa oongaku ndhawo,” ta pandula ngaaka.
Shitaatala oha longele pomakuma gaMvula Complex mOshakati.
Ta ti, ookasitoma ndhe ondhindji ohadhi zi komalukanda ngaashi Onawa, Uupindi, Evululuko, Oneshila, Okandjengedhi oshowo yamwe yokuushayi.
“Kandina ohokwe yoku shuna koshilongo shetu oshoka okuna ondjala, onkalamwenyo yandje muka oyili nawa,” ta ti ngaaka.
Okwa kumagidha wo oshigwana, unene mboka kaayena iilonga opo ya tameke okunyangandhala.
“Kalunga okwa gandja uunongo ku kehe gumwe. Owa pumbwa ashika okuyoolola noku ndhindhilika kutya owuni ekupa, opo wu tameke okuwu longitha,” ta ti ngaaka.
Ta ti, okwa ndhindhilike oyendji kutya kayeshi okukonga iimaliwa yeyi kalela moshilongo muka.
Ta gwedhapo kutya oshimaliwa omo shili moNamibia, ihe oyendji oyeshi tala ashike nomeho, nonando taya ti kayena iilonga.
vkaapanda@nepc.com.na