New Era Newspaper

New Era Epaper
Icon Collap
...
Home / Ta ka gandja ootundi dhokumbaka iikuki “Bella Studio”

Ta ka gandja ootundi dhokumbaka iikuki “Bella Studio”

2018-11-30  Staff Report 2

Ta ka gandja ootundi dhokumbaka iikuki “Bella Studio”

Victoria Kaapanda 

OSHAKATI-Onkulungu moku mbaka iikuki yiituthi yomayinyanyudho ga yoloka Isabella Dala 26, ngoka a tamekele Ongeshefa yokulanditha iikuki moNamibia alihe momvula 2016, okwa tokola okugandja omalongo nkene Iikuki hayi mbakwa.
Dala moonkundathana naKundana okwa ti, ngele to gandja oto galulilwa oshindji, onkene okwa tokola okutameka okugandja omalongo nkene iikuki hayi mbakwa.Osikola ndjoka otayi  ka tameke omvula tayi ya muJanuali pehala lye lyoStudio  mOkandjengedi mondoolopa  yaShakati.

Ta gwedha po ta ti nonando a kala ta gandja omalongo kaantu ye vule 200 momwedhi ngaashi oondohotola, aalongisikola, aanasikola yokuteleka nosho tuu, okwa tokola omvula tayi ya a tameke okugandja omalongo oshoka okwa mono ompumbwe onene yokutseya okumbaka iikuki moshigwana.

“Osikola yandje yedhina Bella Studio otayi ka tambula omapipi agehe ngoka ge na ehalo lyokutseya  okumbaka iikuki. Ite pula oonzapo kungoka a hala okulongwa, ihe ngele gumwe a mana otandi mu pe epapa nokakiti ke na iilongitho yokumbaka oshikuki”. Dala ta ti ngaaka.

Dala ta ti ota ka pula N$1000 mesiku limwe, N$2000 moshiwike omanga uunona wosikola tawu pulwa N$500 Olyomakaya nOsoondoha, sha ikwatelela komuntu ye mwene kutya okwa hala okulongwa omasiku nenge oomwedhi ngapi.

Bella Studio oku na aanilonga ye li yane. Marina Dala, ha longo okutula ko oayisinga oshowo ayihe hayi tulwa kombanda yoshikuki, Geodina Dalla oha foloma oshikuki moludhi ndoka sha pulwa kutya oshi na okukala sha fa peni, Dala yemwene ohe ha mbaka omanga Hilde Sem oha felesiyela iikuki.

“Okumbaka iikuki, inandi ku longwa kosikola, ashike onda koka nako. Onda za megumbo hamu mbakwa iikuki okuza kuushona wandje, nohokwe ndjoka oya kwata ndje  sigo ya fala ndje mokushingitha ngaashi ya eta ndje ponkatu mpaka ndi li nena”. Dala ta ti ngaaka.

Tagwedhapo ta ti elalakano lyokuninga iikuki kali shi ashike lyokuninga oshimaliwa ashike ohokwe ndjoka e na.      
Dala ta ti petameko kakwa li ha pula oshimaliwa, oshoka okwa li ha fala ashike iikuki mpoka pe na iituthi oshali, sigo a ka mona omwaalu gwaantu oyendji taye mu lombwele kutya na tameke ongeshefa ye yokumbaka iikuki, oshoka oku shi okuninga iikuki iiwanawa.

Okwa tegelela omwalu gwa pita 1000 gu kale gwa ishangitha nokutameka osikola oshoka oyendji oya tameka nale okudhenga ya hala oku ishangitha. 

“Ngame ondililepo okuyambula po aakintu aakwetu oshowo oku ya longa oku ithikamena po kuyo yene, noku hulithapo omawupyakadhi ge li momidhingoloko dhetu taga etwa omolwa uuhupilo”. Dala ta yelitha.
Okwa li a gandja omapandulo kuMeme gwe Amalia Dala ngoka e mulongo okumbaka iikuki. Onkalamwenyo ye oya lunduluka noya huma komeho ihe omedhina lyokulanditha iikuki. Uuyelele tawu pumbiwa dhenga konomola  081 2011 144. 


2018-11-30  Staff Report 2

Tags: Oshana
Share on social media