“Ondi li moudjuu wokaana kange ka pumbwa ekwafo lokatemba, kandi na apa andi hange oshimaliwa shaashi ihandi longo, okaana kange ohaka li ashike omashini shaashi oke na oulema nomedimo. Onghee onda pumbwa ekwafo.”

Aa omatumbulo aSecilia Petrus, e na okaana keedula hetatu, ka dalwa noulema ta hokolola nghee a taalela eshongo lakula mokukala nokaana kokalema.

Petrus, omukalimo womomukunda Oshitutuma moshitukulwa shaMusati ou e li a dala okaana ke na oulema wolutu alishe nota hokolola ta ti kutya okwa pumbwa ekwafo tali di moshiwana opo shi mu yambidide opo a mone okatemba kokaana kaye. 

“Ohandi indile kOvasamaria opo va yambidide nge nokashona ve na po ndi shiive ndi lande okatemba kokaana kange,” Petrus ta ti.

Okwa ti okaana kaye ohaka djala omilambo fiyo opaife shaashi ihaka dulu okuya kondje kovene ngeenge ka pumbwa okuya koixwa.

Petrus okwa ti ovakulunhu vaye aveshe ova xulifa nale, onghee meumbo oye ashike e li mo onga omukulunhu, noundenge vaye te va file oshisho.

Ota ti okukala u na okaana ke na oulema kasha shi oshinima shipu, unene tuu kovanhu ava ihava longo oshi li eshongo lakula.

“Okaana kange ohaka nu omiti dimwe dokuvatela ouluvi wako u kale ponhele, ashike omiti odo kadi mo moipangelo yepangelo. Onghee ohandi longifa oshimaliwa shihapu oku ka landa omiti dokaana meehaputeka dopaumwene,” Petrus ta ti.

Petrus okwa ti okuhole okaana kaye nonande ka dalwa noulema, okwa yelifa kutya okaana kaye oko omaano a pewa kuKalunga.

Petrus ota monika konomola yokongodi yaye yopeke, 0813801665, opo oshiwana shi kwatafane naye uuna sha hala oku mu yambidida shi na sha nokaana kaye aka ke na oulema.

Pexulilo okwa twa omukumo ovakainhu vakwao a va ve na ounona voulema opo va kale ve hole ounona vavo, vaha ningile tuu nande ounona vavo ve na oulema oilonga youshada shaashi okaana omaano a dja kuKalunga.