“Kandinasha oufemba woshilongo, nokaana kange ka kenasha oufemba, okaana kange oka dalwa kena oulema molutu lako alishe onghee ohandi xupu noudjuu shaashi kandinasha oyuuyemo. Ondali ku konga omakwafo keembelewa ashike inandi mona ekwafo fiyo onena”.

Aa omatumbulo aDrotea Nicki ta hokolola nghee eli moupyakadi eshi kaavena oufemba aveshe nokaana kaye Paulus Kapilingi weedula hamano.

Nicki omukalimo womukunda Antoni moshikandjohoololo Nehale lya Mpingana, moshitukulwa shaShikoto.

Meenghundafana a ninga naKundana Nicki kwa popya ta ti aveshe nokaana kaye ova dalelwa moNamibia, ashike ka venasha oufemba woshilongo shaashi vati ovakulunhu vavo ova dopa oku va kongela oufemba petameko.

Ina yaKapilingi okwa ti ota pula ekwafo moshiwana opo shimukwafele opo a mone oufemba pamwe nokaana kaye, yee a dule a ka shangife okaana kaye ka kale ta ka mono oshimaliwa shopendjela.

“Okaaana kange iha ka popi, ko vali okadalwa kena oulema womedimo, iha ka dulu oku enda onghee eshi oshi li eshongo linene shaashi okaana kange ota ka mono oixuna,” Nicki ta hokolola.

Okwa yelifa ta ti omukulupe ou adala Nicki okuna oufemba woshilongo welixwapo, na vamwaina aveshe ovena oufemba.

Okwa ti okwa hala epangelo opo limukwafele okukala a mona oufemba woshilongo shaashi paife iha dulu vali oku konga oilonga molwaashi kenasha oufemba.

“Okaana kange ohaka djala omilambo shaashi iha ka dulu okuya koixwa, ko vali iha kali oikulya ikukutu shaashi oka dalwa kena omandjadja ina makola. Onghee ohandi indile ouministeli woukashike kookanhu opo u kale tau yandje omakwafo ko kaana kange shaashi okeli moupyakadi,” Nicki ta ti.

Okwa popya ta ti okwa kala nokukonga omakwafo kumwene womukunda ndele ina kwafelwa.

“Ohandi indile kovasamaria opo va yambidide okaana kange nokatemba opo a kale tai kofikola younona vena oulema shaashi paife okwa kula nokukala tai kofikola ngaashi ounona vakwao,” Nicki ta ti.

Okwa ti ku keshe ou ena ehalo lokuyambidida okaana kaye nakwatafane nombelewa yakansela.

Kombinga yoshikumungu eshi shaNicki keena oufemba nokaana kaye omupopiliko mouministeli meameno netonatelo lokeengamba Margreta Kalo okwa popya ta ti ouministeli oweli longekida opo u kale wa kwafela Nicki nokaana kaye.

Onghee Kalo okwa denga omufindo ta ti Nicki okwa pumbwa oku kufa ina ou emudala ndele tava i naye keembelewa doikwameni opo a dule okukala a mona oufemba tete, nokonima nee ngeenge Nicki okwa mono oufemba ota dulu a ka kongele okaana kaye oufemba.