Ovakwashiwana vomolukanda Ombili modoolopa mEenhana otava nyenyeta tava ti ova kengelelwa ku muni waEenhana eshi vati e va fefa ominino domeva ashike vati ineva futa.
Ova hokolola tava ti omudo wa djako okwa li va udanekelwa ku muni kuya otava pewa eepomba nee domeva opo va kale tava teke osha li pefimbo lomukifi woCovid-19 wali wa shunifa oyuuyemo yovanhu pedu.
“Muni okwe tu lombwela opo tufe omino domeva shaashi fye tu kale ha tu teke oshali oule weemwedi 13. Onghee okudja opo otwa tameka okufa ominino shaashi na fye okwa li twa hafa eshi twa lombwelwa kutya ohatu kala a tuke osha li,” umwe womukwashiwana ta hokolola.
Pefimbo Kundana a talela po olukanda lavo, Ovambili ova hokolola tava ti neudo muMei muni waEenhana okwe va kufulula eepomba domeva ndele tedi landifa po kovakwashiwana vamwe.
Tava ti kave ove udite va kengelelwa.
“Paife ohatu teke keepomba dovakwashiwana ovo va landifwa eepomba. Ohatu futu N$2-50 medini,” omukwashiwana ta hokolola.
Omulumenhu umwe eshi a popya naKundana okwa ti muni waEenhana okwa longifa vati oulingilingi eshi eva fefa ominino shaaashi va ti kwa li a shike a hala eva longife oshali opo a dule okulandifa po eepomba.
“Katu udite ombili eshi paife hatu kala a tu futu omeva popomba oshe twa fa omunino wayo omanga omunhu ou ei landa po ke na eshi a longa,” ta ti.
Eshi a kwatafana naKundana omupopiliko welelo lodoolopa yaEenhana Paulo Shilongo okwa ti konima eshi onghalo yombuto yoCovid-19 ya shuna kouwa ovakwashiwana vopolukanda Ombili okwa li va ningilwa omutumba kutya muni ota kufa po nee eepomba odo kwa li va pewa doshali.
“Otwe va lombwela kutya eepomba ohatu di landifa po komunhu keshe ou ta dulu ondado yokulanda noshoyo okukala tava futu oifuta yomeva kelelo. Onghee otwa ka yakula omaindilo ane ovanhu va hala eepomba odo,” Shilongo ta ti.
Shilongo okwa ti muni okwa li a pula tete ovakwashiwana ngeenge otava dulu okuliyamba okufa ominino domeva opo va shakeneke elelo lodoolopa yaEenhana ondjilakati.
“Ovakwashiwana ova itavela okulihamba okufa omino ashike ka kwa li twa tula po eudaneko navo kutya otava futwa oshimaliwa shonhumba.
Shilongo okwa pula ovakwashiwana opo va kale alushe tava talele po ombelewa ya muni ile va shange omukanda nyenyeto ngeenge ve na eshi ina ve shi hafela.
fhamalwa@nepc.com.na