New Era Newspaper

New Era Epaper
Icon Collap
...
Home / Tava pula opolifi i kale tai kwata po ovalodi neengangala adishe

Tava pula opolifi i kale tai kwata po ovalodi neengangala adishe

2022-05-17  Festus Hamalwa

Tava pula opolifi i kale tai kwata po ovalodi neengangala adishe

OVALUMENHU moshitukulwa shaHangwena otava nyenyeta tava ti kutya opolifi nai kale tai kwata po ovanhu ve na oulodi hava kala tava pondo nokulongela vakwao oushada.

Edi oda popiwa komutumba wovalumenhu wa li ko Olomakaya komukunda Oilyateko moshitukulwa shaHangwena eshi kwa li ovalumenhu va shakena nopolifi opo va kundafane nghee ve na okuxulifa po oimbuluma. Ovalumenhu vamwe eshi va ninga eenghundafana naKundana komutumba wavo, ova lombwela Kundana tava ti ova loloka okukala tava hepekwa kovalodi vopomidingonoko davo eshi hava kala tava pondwa nokuningilwa ominyonena.

Onghee ova hokololela Kundana tava ti ova hala opolifi opo i kale tai kwata po ovanhu tava fekelelwa oulodi shaashi ohava kala unene tava hepeke ovanhu momidingonoko davo. Ovalumenhu ova holola ehandu lavo eshi vati opolifi hai kala ashike tai kwata po ovalumenhu ngeenge va longa oimbuluma ashike ngeenge tava lopota kutya ope na omulodi e shiivike pomudingonoko wavo ta piyaaneke ovanhu opolifi vati kai hole okukwata po omunhu oo.

Omulumenhu umwe ina hala edina laye la tumbulwa, omukalimo momukunda Ondobe okwa lombwela Kundana ta ti okwa loloka okukala ta hepekwa oufiku kovalodi eshi hava kala ashike tave mu hepeke oufiku. “Oveta nai tale po nawa opo shaashi kasha li pauyuuki eshi hatu kala hatu hepekwa kovalodi tave tu ningile ominyonena omanga vamwe ohava tu fingi opo tu kale tuna omhepo yokulonga oimbuluma. Onghee ovalodi navo otava longo ashike oimbuluma ngaashi naana ovanhu va yooloka hava longele ovanhu oushada,” ta hokolola.

Onghee okwa indile opo oveta i kale ya tula oshikumungu eshi moilonga opo oveta i kale tai kwata po omunhu keshe ta ka lopotwa ta longele vakwao ominyonena pamukalo woulodi. Omunyeumbo umwe weedula 55 omukalimo womomukunda Omunyekadi naye okwa lombwela Kundana ta ti opolifi nai kale tai kwata po omunhu keshe ta longele ovanhu ominyonena da yooloka. Okwa ti ovanhu ove shiivike nawa momidingonoko kutya ova nyika oulodi eshi hava kala tava ningile ovanhu ominyonena ashike keve na kutya ova ningwa shike shaashi opolifi nande nai lopotelwa kai na eshi hai ningi po.

Omutumba okwa li wa kwatelwa komesho kopolifi moshitukulwa shaHangwena nongudu yokulwifa oimbuluma yoMen and Women Network nelalakano opo ovalumenhu va kale va xwaxwamekwa nokupewa ouyelele kombinga yokuxulifa po oimbuluma.

– fhamalwa@nepc.com.na


2022-05-17  Festus Hamalwa

Share on social media