New Era Newspaper

New Era Epaper
Icon Collap
...
Home / Taya hupu shokadhila... Aanona ya za koAngola taya li moondoloma

Taya hupu shokadhila... Aanona ya za koAngola taya li moondoloma

2022-03-17  Victoria Kaapanda

Taya hupu shokadhila... Aanona ya za koAngola taya li moondoloma

Osha li ethimbo lyoshanga shomutenya sho oshifokundaneki shika kwa li sha itsu aanona ya za koshishiindalongo taya kondjele iikulya metoto lyiiyagaya mOshikango.

Osha li sha nkundipaleke oomwenyo dhaatoolinkundana oshoka aanona okwa li taya hilathana taya kondjele iikulya ya ekelwahi yo oya ninga nayi, manga ya londa meni lyomandoloma giiyagaya.

Aanona mboka ye li yatatu ayehe oya li kohi yomimvo tadhi tengenekwa dhi li kohi yo-10.

Omukiintu gumwe Omuangola a li a thikama petoto lyiiyagaya mpoka okwa ti, mboka taya li oye li nawa nonando iikulya oya mbuta  otaya makele.

“Otaya nyangele omapunda gawo, katu na nkene tu na okuninga oshoka ngele owe ya keelele otaya si kondjola,” ta popi ngaaka.

Ta ti, kohi yomuti hoka haya zi, gu li konima yondoolopa yOshikango, oku na aanona aashona unene  kwaamboka taya li metoto taya si ondjala, esiku alihe tali piti po inaaya makela sha.

“Ngele otwa li ndele tatu kutaa, otatu faalele kegumbo kuumwameme mboka uushona kutse, oshoka kape na shoka tau li,” okanona kamwe taka popi ngaaka.

Taka ti, owa ningi omasiku gaali inaau lya sha, tawu nu ashike omeya, oshoka kape na iikulya.

Rosalisa Joseph ngoka a li aadhika posheelo shositola yimwe mOshikango okwa ti manga a tegelela okuhumbatela ko aalandi ye na iinima iidhigu, ye a futwe, omwiha gwe ohe gu toola.

Ta ti, iikulya mbyoka tayi ekelwahi okuza moositola moka oyo ha li.

“Ndjika oyo onkalamwenyo tu li muyo. Ondhigu sho we yi tala ashike oshi vulithe okukala ino makela sha. Koshilongo shetu oko nduno ku na iihuna,” ta popi ngaaka.

Ta ti, koAngola kaku na mpoka taya vulu okuhupila ngaashi taya futwa ngaaka, yo taya mono okashona kokulanda omboloto.

“Otatu galikana omvula yi tsikile okuloka koAngola opo tu ka longe omapya getu. Iilonga moNamibia nayo oya pumba, ohatu yi mono ashike kolusindo,” ta hokolola ngaaka.

Ta gwedha po ta ti, aanelago oyo ngaa haya mono iilonga, yamwe ohaya kuthwa po taya ya yi kiitopolwa yimwe omanga yamwe haya kuthwa po taya ka longa esiku ndyoka yo taya galulwa.


2022-03-17  Victoria Kaapanda

Share on social media