New Era Newspaper

New Era Epaper
Icon Collap
...
Home / Taya indile oopelemeta nomatompelo giifundja

Taya indile oopelemeta nomatompelo giifundja

2021-07-09  Festus Hamalwa

Taya indile oopelemeta nomatompelo giifundja

Aantu oyendji otaya longitha uulingilingi oshowo omatompelo giifundja oku indila oompapila dhoku enda oshowo oku pita okuya kiitopolwa yilwe, shoka natango tashi taandelelitha omukithi gwoCovid-19, oshoka itaya tutswa omanga inaa ya pewa epitikilo.

Omupopiliko gwopolisi moshilongo Deputy Commissioner Kauna Shikwambi okwa ti, opolisi oya taalela uupyakadhi woku kondolola mboka yeli moshili oku indila oompapila dhoku enda oshowo okupita okuya kiitopolwa yilwe.

Ndyoka olyo lyimwe lyomoompango dhali dha tulwa po komuPresidente gwoshilongo Hage Geingob okukeelela omukithi gwoCovid-19 gu taandele unene, oshilongo ashihe. “Oshidhigu okumona ngoka ta indile epitikilo mo shili,” ta popi ngaaka.

 Oombapila dhoka odha pitikwa okugandjwa ashike kwaamboka yena omawudhigu gwomeendelelo, ihe opolisi miitopolwa ayihe otayi longo nuudhiginini okukwashilipaleka uushili momayindilo, omanga inayi gandja oompapila dhoka.

“Opolisi oya shunithako aantu oyendji, mboka taku  fekelwa kutya ka yeli moshili. Oombapila dhoka itadhi gandjwa ashike kopolisi, ihe nokooministeli dhilwe. Mboka taya longitha uulingiliki oku ninga omayindilo otaya yonene  mboka yeli moshili,” ta popi ngaaka. Ta ti, shoka tashi kondjithwa, omukithi ngoka kaagu taandele, onkene oshigwana nashi idhidhimike shi gwanithapo oompango dhoka, okulwitha omukithi ngoka gu shonopale gwo gu hule po thilu.

Shikwambi okwakumagidha oshigwana shiikaleke ko kule niiyendo inaayipumbiwa omanga omasiku ngoka ga tulwa po taga adha.

“Oompapila dhoku pita nadhilongithwe paayuuki okukwathela mboka yeli muupyakadhi womeendelelo,” ta kumagidha

Kundana sho ali aningi omapekapeko moshigwana, oyendji oya hala aantu ya kale taya pewa oombapila dhe pitikilo uuna ya holola iizemo yawo yoCovid-19.

Simon Negumbo gwomOshakati okwati, itashi kwatha sha, iitopolwa ya patwa oshoka natango aantu otaya pewa epitikilo nonando inaya tutswa. “Mboka taya pewa epitikilo oyo taya faalele omukithi kiitopolwa hoka taya yi. Ngame ota indile oshilongo shi shunwe kondondo yo tango, hoka iinima oyindji yali ya patwa thiluthilu. Omukithi okwali gwa sho nopala,” Negumbo ta ti  ngaaka.

Ta ti, itashi kwathele sha, iitopolwa ya patwa oshoka natango aantu yeli mooministeli dha pewa uuthimba dhi gandje oompapila dhoka, natango otadhi gandja omapitikilo kaapambele yawo, kaayena omatompelo go ntumba. 


2021-07-09  Festus Hamalwa

Share on social media