Hilma Nakanduungile

OSHIKUNDE- Aakalimo yomomukunda Oshikunde moshitopolwahogololo shaShikunde mOhangwena otaya pula ekwatho kaasamaria aanamutimahenda opo ye ya yambidhidhe, konima sho omagumbo gawo ga hanagulwa po koshikungulu shomvula nombepo mEtitatu.

Oshikungulu shika otaku hokololwa sha hanagula nokuyonagula po omagumbo ge vulithe pugatano momukunda moka, mwa kwatelwa oskola. 

Omunamimvo 40 Paulina Hembala ota hokolola kutya oshiningwanima shika oshe ya halutha noonkondo, noshe ya thiga pomutenya. “Oondunda nongandjo yegumbo lyetu oya pepwa po. Iilya nomausila oga tika, mwa kwatelwa noombuto. Tse oothigwa tatu ilele. Aavali yetu ayehe oya hula ko nale, nokuli ongame omukuluntu nomutonateli gwayakwetu, onkene kandi wete naampo tandi kwata molwashoka kandi na iiyemo yomungunda,” Hembala ta ti ngaaka. Ta tsikile ko ta pula oshigwana opo shi tondoke onkugo yawo.

“Otatu indile kaanamutimahenda ye tu yambidhidhe nokashona hoka ye na po. Otwa pumbwa omakwatho ngaashi giikulya nogiitungitho, tu igwedhe, tse vule okutungulula egumbo lyetu,” Hembala ta ti ngaaka.   Omunamimvo 45 Sylvia Nangolo naye wo gumwe gomwaamboka ya hangululilwa omalukalwa gawo koshikungulu ota ti, nonando nee ya thigwa pomutenya koshikungulu, ota pandula Kalunga, oshoka inamu monena omuntu oshiponga.

“Oshiningwanima shika oshe tu hepeka  momadhiladhilo noonkondo. Onda li ashike nda ninga onkambadhala ndi tule ko iipeleki kongandjo, tse andola tatu ende tatu gwedha ko sigo ya tsakana, nena iipeleki oyo mbyoka ya pepwa po,” Nangolo ta tumbulula ngaaka.

Nangolo naye oti indile kukehe ngoka ta vulu okuyayambidhidha a tondoke onkugo yawo, ya vule okweendukulula olukalwa lwawo.

Kamnsela gwoshitopolwahogololo shaShikunde, Lonia Shinana-Kaishungu pethimbo a talele po oonakuninga iihakanwa okwa ti kutya ombelewa ye otayi impwiyukile nokukonga omakwatho, ashike shika inashi imba oshigwana shi yambidhidhe mpoka tashi vulu, molwashoka omakwatho gopambelewa otashi vulika ga kwate olule. 

“Otatu indile moshigwana, aantu oohandimwe, oombelewa adhihe, mwa kwatelwa oshikondo shoka hashi ungaunga niinima yombaadhilila ya tale kutya otaye tu yamukula ngiini,” Shinana-Kaishungu ta ti ngaaka.

Shinana-Kaishungu ta gwedha ko kutya uuna oshigwana tashi yambidhidhi oonakuninga iihakanwa, komukalo nguka otashi ya hungu omwenyo.