Victoria Kaapnda

ONGWEDIVA - Aakalimo yomikunda dhi li popepi netoto lyaNgwediva oya yemata kiimuna yawo mbyoka tayi li oopalastika noondoya ndhoka hadhi ekelwahi ketoto enene.

Ngaashi shi sha tseyika nawa kutya ketoto ndyoka enene lyaNgwediva olyo hali ekelwa oondoya adhihe dhomomudhingoloko gwaNgwediva, omu na oondoya odhindji ndhoka tadhi vulu okudhipaga iimuna ngele ya makele oondoya ndhoka.

Gumwe goomakalimo yomoNgwediva okwa li a lombwele onzonkundaneki ndjika ta ti, unene oopalasitika ohadhi pepe dhu uka momakoye gawo, ta ti shika osha nika oshiponga kiinamwenyo yawo unene pethimbo ndika lyondjala.

Ta ti oshidhigu okulitha iimuna pethimbo ndika lyondjala, oshoka kape na mpoka tayi lithilwa ano pe na oomwidhi nomeya. Ihe ohaye yi ethele ashike momalundu gawo yi nape, ihe haoondoya noopalastika ndhoka tadhi pepe okuza metoto, odha ninka oshiponga lela kiimuna.

“Oshihwepo ngele elelelo lyondoolopa lyi kale lya sila oshimpwiyu etoto ethimbo alihe, oshoka otatu ka adha ashike iinamwenyo yetu ya sa na itatu ka tseya kutya oya sa koshike. Naya kale haya fike oondoya ndhoka hadhi vulu kupepwa mo mekoye lyetoto”, Omukalimo gumwe ta ti ngaaka.

Omugandjimulombo oshowo omupopiliko gwElelo lyondoloopa yaNgwediva Jackson Muma okwa li a yelithile Kundana kutya shoka tashi  nyenyetwa kaakalimo oshoshili, ihe ohaya kambadhala aluhe okukandula po uupyakadhi mboka, ta ti oye na omikalo dhontumba okukelela uupyakadhi ngaashi naanaa mboka  kawu holoke.

“Ketoto lyetu otwa tula ko aanilonga mboka ye na okutonatela etoto oshowo okukelela oondoya noopalstika ndhoka kaa dhi ye kondje yohofa, naashoka ngele osha holoka natango ngaashi tashi nyenyetwa kaakalimo yomomidhingoloko dhi i popepi netoto ndyoka, otatu gandja ombili notatu shi kandula po lela”,Muma ta ti ngaaka.

Nonando etoto oli na ondhalate, Muma okwa ti shoka hashi eta iiyagaya mbyoka yi ye kondje yondhalate kashishi nando okwaasilwa oshimpwiyu kwetoto, ihe ombepo ashike, ihe elelo lyondoolpa otali shi pukulula.