Omudhani gwiinyandwa mOshiwambo noshowo omuhikingalo a tseyika nawa onga okathitukuti miinyandwa yaNdjeke gwedhina Mathew Shipushu a tseyika nawa nedhina Thimbiko okwa hulitha ongula yohela.

Mboka ye li popepi naye oya hokolola kutya omunyandi nguka okwa mana uuyenda we moshipangelo shaShakati moka kwa hokololwa kutya okwa li u uvite ta ehama omutse nokuhulitha mbala. Moshipangelo moka okwa li a falwa mo omutenya gwOsoondaha yehuliloshiwike ndika. Mathew ngoka e li omvalele yokomukunda gwedhina Onakiidhi mOndonga okwa putukila mOngwediva nokwa sa mepipi lyoomvula 28. Na ina thiga ko nande omunona.

Thimbiko okwa li a tameke okudhana iinyandwa tangotango nomudhaninyandwa a tseyika nawa nedhina Ndjeke yaMalimba Omukuusinda gwAangula omanga nduno ina tameka okukala ta dhana woo iinyandwa nomudhani gwiinyandwa gumwe a tseyika nawa nedhina Nkandanga.

Okuza mpoka oshitalenti she osha li sha koko ee ta tameke okudhana oongalo ndhoka unene a li ha imbi nomuhikingalo Mbuku. Mbaka yaali oya kala nokunyanyudha uuyuni mokupitila mwaashoka.