WINDHOEK – Osipana yaNamibia ndjoka onkulunkulu, Tigers FC oya shanga omukandanyenyeto gu uka koNamibia Premier League moka tayi ulike okwaa uva nawa kwawo, oshoka NPL okwe shi ninga omukalondjigilike mokundopa okuuva ko nokutula miilonga oompango nomilandu dhe mwene. Omukanda nguka ogwa shangwa nogwa shayinwa  komunashipundi gwoTigers Dino Ballotti, osipana otayi pe uusama oNFA aniwa sho ya ndopa okulonga noshikumungu shekutho lyosipana yokoGobabis moliha yopombanda moshilongo okupitila metokolo lya ningwa kokangundu ke na sha niipotha yoludhi nduka oshiwike sha zi ko.

Okangundu haka oka li ka mono oYoung African ondjo mekengelelo moka ya longitha nokushangitha omudhani gwaZimbabwe Tapiwa Simon Musekiwa nuuthemba waa shi we shili, moka okangundu haka ke wete sha li sha ningilwa owina.

Onga oshizemo, osipana ndjika oshiwike sha zi ko oya li ya tsuwa mo iilyaalyaka moliha osho wo okupewa egeelo yi fute N$50 000.

Ashike shika osipana yoTigers kayi shi uvitile nawa oshoka oyi wete NPL inaa ninga omapekaapeko ganakupwe moshinima shika onkene etokolo lyawo halyo naanaa.

Onkene, Tigers kayi uvite nkene tashi vulika omudhani ngoka a itaala kutya okwa longitha uukengeleledhi a pitikwa natango a dhane moliha ndjoka yopombanda. Musekiwa ngashingeyi oha dhanene osipana ndjoka oyo yi li enyakwa, African Stars.
Omvula ya zi ko, Musekiwa, okwa li a itaala kopolisi yaNamibia kutya okwa li a longitha uukengeleledhi nokwa li e shi sho ta ningi opo a dhanene oYoung African moka a longitha opasporta yedhina Albert Mujikirera.