New Era Newspaper

New Era Epaper
Icon Collap
...
Home / Tjongarero a pula Aakwaswapo ya tule ombunda moshihwa

Tjongarero a pula Aakwaswapo ya tule ombunda moshihwa

2019-12-06  Staff Reporter

Tjongarero a pula Aakwaswapo ya tule ombunda moshihwa

KEETMANSHOOP– Omuleli omukuluntu gwoSwapo ngoka oye a kalela po oshitopolwa sha//Kharas Agnes Tjongarero okwa li a pula iilyo yongundu yi longe nuudhiginini opo yi kwashilipaleke kutya ongundu otayi sindana momahogololo ga gwedhwapo guukansela goshikandjohogololo Keetmanshoop Urban kuyele omvula tayi ya. Tjongarero okwa li a popi ndhika pomutumba gwopashikandjo shaKeetmashoop gwa gwedhwa po mEtitatu. “Pethimbo lyomahogololo gopauPresidente naangoka gOmutumba Gwopashigwana otwa li twa kanitha oshikandjo shika nomawi konyala 200, ngashiingeyi otu wete kutya otatu ka sindana. Otatu ka sindana ngiini ngele itatu longo nuudhiginini? Natu longeni shoka twa li twa ndopa okuninga momahwahwameko gomahogololo ngoka ga za ko, ngaashi okweenda omagumbo koolimwe noolimwe. Otu na okuninga iinyengandunge opo tu sindaneni,” ta dhenge omuthindo ngaaka.

Tjongarero ta ti omahogololo gomvula yayi ya otaga ka kala ga yooloka oshoka omahogololo gopashitopolwa ohaga tala unene kiinima yi na sha nonkalamwenyo nuuhupilo osho wo okukwathela oshigwana. 
“Otwa uva omanyenyeto agehe ga za kwaamboka ye tu hogolola pethimbo lyomahwahwameko onkene otu na okulonga nuudhiginini…Omu na okulonga nuudhiginini pu ye ehumokomeho,” ta gwedha po ta ti ngaaka. Tjongarero okwa li wo a ulike okuuva nayi kwe kombinga yaagundjuka yomoKeetmanshoop, ta ti otaya vulu okupalutha aakalimo okupitila moofaalama dhoohi osho wo iikuninio yiikwamboga, ashike inaya hala okulongitha ompito ndjoka.

“Shoka ya pumbwa okuninga okupula ashike oombuto…aagundjuka naye ye po nomathaneko ndele hakugandja ashike uusama ngaashi haye shi ningi ngashiingeyi,” ta ti ngaaka. Ta popi wo pomutumba ngoka, omukwatakanithi gwoSwapo mo//Kharas, Matheus Mumbala okwa ti aagundjuka oya kala nokugandja omathaneko gawo, nethimbo olya thikana opo aaleli ya pulakene nokukandula po omashongo ngoka. “Otu na  na okupulakena kaagundjuka ngaashi naanaa natse twa hala ye tu pulakene. Okwaa na iilonga osho wo elongo lyopomanda lyoshali nayi talike,” ta ti ngaaka.

Mumbala ta fatulula kutya omutumba gwa gwedhwa po ogwa li gwe ya opo ku hogololwe oshilyo shongundu shoka tashi ka thikama momahogololo guukansela ga gwedhwa po moshikandjohogololo Keetmanshoop Urban ngoka ta gaka kala ko momasiku 15 Januali 2020.

Omahogololo ga gwedhwa po oga etwa konima sho Hilma Nicanor a li a ikutha miilonga, i iyutha kokatendo koEloctoral Act, no.5 of 2014 nekotampango lyaNamibia, opo a vule oku ka kala okandidate yongundu momutumba gwopashigwana momahogololo ngoka ga zi ko. Nicanor oku li ponomola 18 momusholondoondo gwoSwapo gwomutumba gwopashigwana. Okwa li kansela gwoKeetmashoop Urban okuza mo2004. Festus Shilimela oye a li a mono mo omawi ogendji (24) na oye ta ka kalela po Swapo moshikandjohogololo Keetmanshoop Urban momahogololo, okwa li a landulwa kuPaul Johannes Kisting (omawi 14), Sussana Ikela Kamati (omawi 7) naWillem Ulrich Dawids (omawi 5).


2019-12-06  Staff Reporter

Tags: Karas
Share on social media