OMUTHIYAS – Tsumeb di !ā!khōmais ge 23 sîsenaon hîa kuriga ǁîn tawa ǁaerob ǀguipa gere sîsense gere !khaehe ka !gaehe tsî nē ǂnûiǂgās ai!gûs !nâ !â-e ge ǀhuruna nî !gaeǂgā. 

!Kharu ge tsēdi !nâs ge Affirmative Repositioningsa (AR) nē !ā!khōmaisa ǁgâiba ge mā hîa ǀgūǁae ge !nurihe !nae!khaidi !nâ khoen hîa ge !nani ǁkhâgu ǁaeb ǀguiba a sîsenn ge a !gaeǂgāhe tsî naun ǁaupexa 18 kurina sîsen hâna !gaeǂgā tama is khao!gâ.

!ā!khōmai-aob, Mathews Hangulab ge nausa ARs di ǂgā-made !haraxu tsî ge mî, ǀawemā!nans ge nē mîǁguib khoena !gaeǂgās diba ǀnai !gaugaba xu hâ ǁgâi-i ose a ūsa. 

“Tita ge ǁnān hîa nē ǂnûiǂgās !auga hâ khoen ǀkha ǂhôana ra ǀgoraguna ra ǂgan in hoaǁae ǁawoǁawo, ǂhanu tsî ama ǂhôana aibe ôasa ama tama ǂhôan soas !nâ. Nē ǁhōb kurina sîsenhâ khoen dib ge ǀnai ǂâisa ra ǂnûi-aihe tsîs ge !ā!khōmais ǀawemā!nansa ǀgūǁae ǁnâu!nāpe ǁnā soade nî ǂanǂan,” tib ge Hangulaba ge mî. 

ǂHanusi māǂuis hîas ge ǂNûǁkhaeba ra Dana Sîsenǂuira Mâisas, Monique Murisa ǂoa ge wekheb Donertaxs ai māǂui hâ is !nâ-i ge ra mîhe, ǁîn ǀawemā!nans ge 21 Taraǁkhumuǁkhâb dis ai a ū aoǁguiba ra saosa, ǁnāpan gaxu ǁaeba ǁawosase !gaeǂgāsa tamase sîsenhâ khoena nî !gaeǂgāsa.

ǁKhātin ge ǀawemā!nans khoena !gaes ǂnamipe ūhâ xoaǁguiba daoǁgaub ase ra sîsenū. 

“ǀAwemā!nans ge ǀguis khami i ǀgau-i ain ǀgorasa sîsenaona !gaes ǂnamipe ra sîsen !nae!khai-i xa a ǀū, ǁîn !gāsa xoaǁguiba nēs ǂnamipe khoena !gaes tsî sîsenni !aroma ǁhûis !nâ ūhâ amaga, xaweb !gomsiba nî hâs kara, os ge ǀawemā!nansa nî ǁgui!ābahe tsî ǀhûǁarebese oresa nî ôahe,” tis ge gere ǀgonǀgon!gao. 

ARs di John Johannesi ge ǀawemā!nansa ǂhanuo!nâ !gaeǀgaugu ǀkha gere ǀhapiǂnûiǀkhā, mî rase ǁnān hîa 18 kurina N$1800.00 ǁkhâkorobe !khō!oamaris ai nē ǂnûiǂgāsasa sîsenba hân !gaeǂgāhe tamasen !nubu ǁaerob ǀguiba hâ khoena ge !gaeǂgāhes ǂnamipe. 

“2016ǁî kuriba xun ge nē sîsenaona mîmâibahes ǀguisa !gaeǂgāhen nîsa ra dī, xawe garakube ǀhuruhes ǀguisa ra dī, tsî ǀasa khoena ra !gaeǂgāhe. Nēs ge ǂhanu tama hâ tsî mā-amhe tise,” tib ge Johanessa 22 Taraǁkhumuǁkhâb aib ge xoa sîǂkhanis !nâ ra !khâikhom.