Oshiputudilo shopanda, oUniversity ya Namibia (Unam) osha yambidida eenhauki kEtunda noikulya oshowo oidjalomwa.
Unam okwa yandja yo vali oikulya kombelewa yaNgoloneya waHangwena i pewe ovanhu veli momumbwe yoikulya moshitukulwa omo.
Moshipopiwa shaye pefimbo ta yandje oikulya keenhauki oshivike sha dyako, omukulunhu woUnam Kenneth Matengu okwa popya ta ti Unam ota lalakanene okukwafa ovanhu veli momhumbwe yoikulya.
Matengu okwa yelifa ta ti olwishi neengobe mbali edi da pewa ovaangola oda dja moshiputudilo shounamapya shaUnama mOgongo.
Okwa ti olwishi ola longwa kovaanafikola tave lihongele ounamapya mOgongo Unam.
Ngoloneya moshitukulwa shaMusati Erginus Endjala okwa pandula Unam eshi ta lalakanene okuyambidida oshiwana shili momhumbwe yoikulya.
Endjala okwa ti oshiwana na shi kufeko oshihopaenenwa koUnam, opo na sho shi kale sha yambidida Ovaangola shaashi eenhauki edi oda pumbwa natango omakwafo ahapu ngaashi oikutu, oikumbafa nosho tuu oipumbiwa yawedwa po.
Ngoloneya okwa ti mopaife ngaha omukundu womukaya owa kaNdulwa po shaashi eenhauki oda tomenwa eengobe mbali koUman, onghee paife oshivelelwa opo shili shawanena eenhauki.
“Otuna ounona va dalwa keenhauki vena eedula da wana okuya kofikola, onghee ohandi indile ouministeli wehongo ile omahangano opo a kale a yambidida ounona va kale tava ningilwa eetundi dofikola. Onghee osha fimana ngeenge ounona veenhauki otava ka pewa omhito opo va kale tava ningi oinyangadalwa yofikola,” Endjala ta ti.
Endjala okwa kunghulila oshiwana opo shi kale shina ombili neenhauki nokukelela okulongela eenhauki ominyonena.
Eenhauki oda didilikwa dambolokotela moNamibia ketameko lomudo ou molwaashi oshikukuta eshi shili poushiindalongo Angola.